නගර කරා සංක්රමණය වී රැකියාවල නිරත වන නමුත්, එම නගරවල ස්ථිර පදිංචිවීමේ ලියාපදිංචිය නොමැති සේවකයන් (Migrant Workers) වෙනුවෙන් මූලික පොදු මහජන සේවාවන් රැසක් විවෘත කිරීමට චීන මධ්යම රජය අද (22) නව මාර්ගෝපදේශ මාලාවක් නිකුත් කර තිබේ.
චීනය තුළ වසර 1950 දශකයේ සිට ක්රියාත්මක වන ‘හුකෝවු’ (Hukou) නැමති පදිංචිවීමේ සහ ගෘහස්ත ලියාපදිංචි කිරීමේ ක්රමවේදය හේතුවෙන්, ග්රාමීය ප්රදේශවලින් නගර කරා පැමිණෙන සේවකයන්ට අධ්යාපනය, සෞඛ්ය සහ නිවාස වැනි මූලික පොදු පහසුකම් ලබා ගැනීමේදී දිගු කලක් තිස්සේ දැඩි දුෂ්කරතාවලට මුහුණ දීමට සිදු විය. මීට පෙර මෙම සේවාවන් පුද්ගලයා උපන් ස්ථානය මත පදනම්ව තීරණය වූ අතර, නව මාර්ගෝපදේශ මඟින් එම සීමාවන් ඉවත් කරමින් පුද්ගලයා දැනට සාමාන්යයෙන් පදිංචිව සිටින ස්ථානය (Place of residence) මුල් කරගනිමින් පොදු සේවාවන් සැපයීමට රජය තීරණය කර ඇත.
තමන් සේවය කරන නගරවලට තම දරුවන් රැගෙන එන සංක්රමණික සේවකයන්ගේ දරුවන්ට රජයේ පාසල්වල අධ්යාපනය ලැබීමටත්, එම නගරවලදීම පාසල් ප්රවේශ විභාග සඳහා පෙනී සිටීමටත් අවස්ථාව සැලසේ. මීට අමතරව, නගරවල ස්ථිර ලියාපදිංචියක් නොමැති වුව ද ස්ථාවර රැකියා නිරත පිරිස් සඳහා රජයේ කුලී නිවාස ව්යාපෘති (Public rental housing) පුළුල් කිරීමට සහ සේවා ස්ථාන ආශ්රිතව සමාජ රක්ෂණ ක්රමවේදයන්ට (Social insurance) ඇතුළත් වීමට අවස්ථාව හිමි වෙයි.ළමා සුරැකුම්, වැඩිහිටි සත්කාර සහ ආබාධිත පුද්ගලයන් සඳහා වන සේවාවන්වලදී පනවා තිබූ ‘හුකෝවු’ සීමාවන් ලිහිල් කෙරෙන අතර, වැඩි වශයෙන් ජනගහනය සංක්රමණය වන නගර සඳහා අවශ්ය මූල්ය ප්රතිපාදන පුළුල් කිරීමට ද පළාත් පාලන ආයතන දිරිමත් කර තිබේ.
දශකයකටත් වැඩි කාලයක සිට මෙම ක්රමවේදය ප්රතිසංස්කරණය කිරීමට චීනය උත්සාහ දරමින් සිටි අතර, මෙම නව ලිහිල් කිරීම් හරහා ජනතාවගේ සමාජ ආරක්ෂණය තහවුරු වනවා සේම අපනයන මත වැඩි වශයෙන් යැපෙන චීන ආර්ථිකයේ දේශීය පාරිභෝගික ඉල්ලුම සහ ගෘහස්ත වියදම් (Consumer Demand) තවදුරටත් ඉහළ යනු ඇතැයි ආර්ථික විශ්ලේෂකයෝ අපේක්ෂා කරති.
