පාසල් සිසුන් අතර මේ වන විට වෛරස් මෙනින්ජයිටීස් (මොළේ උණ) රෝග තත්ත්වයක් පැතිර යමින් පවතින බවත්, එහෙත් ඒ පිළිබඳව මහජනතාව අනිසි බියක් ඇති කරගත යුතු නොමැති බවත් ප්රධාන වසංගත රෝග විද්යාඥ විශේෂඥ වෛද්ය පාලිත කරුණාපේම මහතා පවසයි.ප්රථමයෙන්ම දෙනියාය ප්රදේශයෙන් වාර්තා වූ මෙම රෝගී තත්ත්වය මේ වන විට දිවයිනේ ප්රදේශ කිහිපයකින්ම වාර්තා වී තිබේ. ඒ අනුව මේ වන විට දියතලාවෙන් රෝගීන් 28ක්, රිකිල්ලගස්කඩින් 25ක් සහ වැලිමඩෙන් රෝගීන් 13ක් පමණ වාර්තා වී ඇති බව විශේෂඥ වෛද්යවරයා සඳහන් කළේය. වසංගත රෝග ඒකකය සහ පළාත් සෞඛ්ය බලධාරීන් එක්ව මේ පිළිබඳව නිසි ක්ෂේත්ර ගවේෂණ කටයුතු සිදුකරමින් පවතින අතර, මෙය වෛරස් ආසාදනයක් (Viral Meningitis) බවට මේ වන විට තහවුරු කරගෙන ඇත.
තද උණ, හිසරදය සහ වමනය මෙහි ප්රධාන රෝග ලක්ෂණ වන අතර, රෝගයට ගොදුරු වූ බහුතරයක් දෙනා මේ වන විටත් රෝහල්ගතව ප්රතිකාර ලබති. නිසි වෛද්ය ප්රතිකාර ලැබීමෙන් දින 5ත් 7ත් අතර කාලයකදී කිසිදු බරපතළ සංකූලතාවකින් තොරව රෝගය සම්පූර්ණයෙන්ම සුව වන බව හෙතෙම සහතික කරයි.
පවතින වර්ෂා සහිත කාලගුණය මෙන්ම වෙසක් සමයේ පවත්වනු ලබන දන්සල් ආශ්රිතව මෙම රෝගය ව්යාප්ත වීමේ අවදානමක් පවතී. මෙම රෝගය ප්රධාන වශයෙන්ම අපවිත්ර වූ ජලය සහ ආහාර මඟින් ශරීරගත වන බැවින්, ආහාර පාන පරිභෝජනයේදී වඩාත් සැලකිලිමත් වෙමින් නිසි සෞඛ්යාරක්ෂිත ක්රමවේද අනුගමනය කිරීම අත්යවශ්ය වේ.පාසල් ළමුන් අතර මෙම රෝගය වැඩි වශයෙන් ව්යාප්ත වෙමින් පවතින බැවින්, රෝගය පැතිරීම අවම කරගැනීම සඳහා සෞඛ්ය බලධාරීන් පාසල් බලධාරීන් සමඟ ඉතා සමීප සම්බන්ධීකරණයකින් යුතුව අවශ්ය සියලු පාලන කටයුතු සූදානම් කර ඇති බව ද වෛද්යවරයා වැඩිදුරටත් අවධාරණය කළේය.
