තායිවාන රජය විසින් ඉදිරිපත් කරන ලද ආරක්ෂක වියදම් ඉහළ නැංවීමේ සැලසුම්වලට සහය දක්වමින් සිය ගණනක ජනතාවක් සහභාගී වූ දැවැන්ත රැලියක් සෙනසුරාදා (23) තායිපේ (Taipei) අගනුවර මධ්යයේදී පවත්වා තිබේ. තායිවාන ජනාධිපති ලායි චින්ග්-තේ (Lai Ching-te) විසින් ආරක්ෂක අංශ වෙනුවෙන් ඉල්ලා සිටි ඩොලර් බිලියන 40 ක පරිපූරක අයවැයෙන් තුනෙන් දෙකක (2/3) ප්රමාණයක් පමණක් අනුමත කිරීමට එරට විපක්ෂය සතු බහුතර බලයක් සහිත පාර්ලිමේන්තුව පියවර ගැනීමත් සමඟ මෙම ජනතා විරෝධය මතු විය.
තායිවානය තමන්ගේම භූමියක් ලෙස සලකන චීනයෙන් එල්ල වන තර්ජන හමුවේ රටේ ආරක්ෂාව තර කරගැනීම සඳහා ඇමෙරිකානු ආයුධ මිලදී ගැනීමට මෙන්ම දේශීයව නිෂ්පාදනය කරන ඩ්රෝන යානා ඇතුළු නවීන තාක්ෂණික මෙවලම් වෙනුවෙන් මෙම මුදල් වෙන් කිරීමට ජනාධිපතිවරයා අපේක්ෂා කළේය. කෙසේ වෙතත්, පාර්ලිමේන්තුවේ බහුතර බලය හිමි විපක්ෂය මෙහිදී රජයේ යෝජනා අපැහැදිලි බවත් ඒවා හරහා දූෂණය සිදුවිය හැකි බවත් පවසමින් දේශීය නිෂ්පාදන සඳහා වෙන් කළ මුදල් කපා හැර ඇමෙරිකානු ආයුධ මිලදී ගැනීමට පමණක් අදාළ ප්රතිපාදන වෙන් කර තිබේ. රජය මේ වන විට නව “T-Dome” ඒකාබද්ධ ගුවන් ආරක්ෂණ පද්ධතිය (Integrated Air Defence System) ඇතුළු ඉතිරි ආරක්ෂක ව්යාපෘති සඳහා ද අනුමැතිය ලබා ගැනීමට දැඩි උත්සාහයක නිරත වේ.
මානව හිමිකම් සහ තායිවාන නිදහස් ගැති සංවිධාන කිහිපයක් එකතු වී සංවිධානය කළ මෙම විරෝධතා රැලියේදී, සැබෑ සාමය උදාවන්නේ ශක්තිමත් ජාතික ආරක්ෂාවක් තුළින් පමණක් බවත් චීනයේ ව්යාප්තවාදයෙන් තායිවානයේ නිදහස රැකගත යුතු බවත් විරෝධතාකරුවෝ අවධාරණය කළහ. මේ අතර, තායිවානයේ ප්රධානතම විපක්ෂය වන කුවෝමින්ටැන්ග් (Kuomintang) පක්ෂයේ සභාපතිනි චෙන්ග් ලි-වුූන් (Cheng Li-wun) ප්රකාශ කර ඇත්තේ තමන් ආරක්ෂක වියදම්වලට විරුද්ධ නොවන නමුත් රජයට හිස් චෙක්පත් (Blank Cheques) ලබාදිය නොහැකි බවයි. පසුගිය මාසයේදී චීන ජනාධිපති ෂී ජින්පිං ද හමුවූ ඇය කියා සිටියේ තායිවානය ආයෝජනය කළ යුත්තේ යුද්ධය වෙනුවෙන් නොව සාමය වෙනුවෙන් බවයි. කෙසේ වෙතත් බීජිං පාලනයේ ස්වෛරීත්ව හිමිකම් ප්රතික්ෂේප කරන තායිවාන රජය පවසන්නේ රටේ අනාගතය තීරණය කළ හැක්කේ තායිවාන වැසියන්ට පමණක් බවයි.
