ලංකාවම කම්පා කරමින් මහත් ආන්දෝලනයකට තුඩු දුන් යාපනයේ සිවලෝගනාදන් විද්යා දැරිය පැහැරගෙන ගොස්, සමූහ දූෂණයකට ලක් කර මරා දැමීමේ චෝදනාවට වරදකරු වී මරණ දඬුවම නියම වී සිටි පුද්ගලයෙකු බන්ධනාගාරය තුළදී සියදිවි නසාගෙන තිබේ. මෙලෙස සියදිවි හානිකරගෙන ඇත්තේ පූබාලසිංහම් ජෙයකුමාර් නමැති 46 හැවිරිදි මරණදඬුවම් නියම වූ සිරකරුවෙකි.යාපනය බන්ධනාගාරයේ රඳවා සිටි මෙම සිරකරු ඊයේ (24) රාත්රී කාලයේදී මෙලෙස සියදිවි නසාගෙන ඇති බව බන්ධනාගාර දෙපාර්තමේන්තුව නිල වශයෙන් තහවුරු කර ඇත.
පසුගිය 2015 වසරේදී සිදුවූ මෙම අතිශය බිහිසුණු අපරාධය සම්බන්ධයෙන් යාපනය ත්රිපුද්ගල මහාධිකරණ විනිසුරු මඩුල්ලක් (Trial-at-Bar) විසින් ‘ස්වීස් කුමාර්’ ඇතුළු ප්රධාන විත්තිකරුවන් හතරදෙනෙකුට පනවා තිබූ මරණීය දණ්ඩනය, ශ්රේෂ්ඨාධිකරණය විසින් ඉකුත් මැයි 6 වැනිදා යළිත් වරක් ඒකමතිකව තහවුරු කරනු ලැබීය. තමන්ට පනවා ඇති මරණ දඬුවම ඉවත් කර නිදොස් කොට නිදහස් කරන ලෙස ඉල්ලා විත්තිකරුවන් විසින් ඉදිරිපත් කර තිබූ අභියාචනා පෙත්සම් සම්පූර්ණයෙන්ම නිෂ්ප්රභ කරමින්, අගවිනිසුරු ප්රීති පද්මන් සූරසේන මහතා ප්රමුඛ පංච පුද්ගල ශ්රේෂ්ඨාධිකරණ විනිසුරු මඩුල්ලක් විසින් මෙම අවසන් තීන්දුව ලබාදී තිබුණි.
කෙසේ වෙතත්, එම අභියාචනා තීන්දුවේදී සාක්ෂි ප්රමාණවත් නොවීම මත වෙනත් විත්තිකරුවන් දෙදෙනෙකුට පනවා තිබූ දඬුවම් ඉවත් කර ඔවුන් නිදහස් කිරීමටද අධිකරණය නියෝග කළේය. ශ්රේෂ්ඨාධිකරණය විසින් මෙම තීරණාත්මක නියෝගය ප්රකාශයට පත් කළ අවස්ථාවේදී, දැනට යාපනය බන්ධනාගාරයේ රඳවා සිටින මෙම සියදිවි හානිකරගත් ජෙයකුමාර් ඇතුළු මරණීය දණ්ඩනය නියම වූ විත්තිකරුවන් තිදෙනෙකු සූම් (Zoom) තාක්ෂණය ඔස්සේ සජීවීව අධිකරණය වෙත සම්බන්ධ කර සිටි බවද වාර්තා වේ.
