සයිබර් ප්රහාරයක් හේතුවෙන් මුදල් අමාත්යාංශයට අයත් ඇමෙරිකානු ඩොලර් මිලියන 2.5ක මුදලක් වංචා කිරීමේ සිද්ධියකට අදාළව සේවය අත්හිටුවා සිටි, මුදල් අමාත්යාංශයේ බාහිර සම්පත් දෙපාර්තමේන්තුවේ සහකාර අධ්යක්ෂවරයෙකු ලෙස සේවය කළ රංග රාජපක්ෂ මහතාගේ මරණය, ඔහු විසින්ම සිරුරට සිදුකර ගන්නා ලද කැපුම් තුවාල (Self-inflicted cuts) හේතුවෙන් සිදුවූවක් බව සිව්පුද්ගල විශේෂ අධිකරණ වෛද්ය නිලධාරී කමිටුව ඒකමතිකව තීරණය කර තිබේ. මෙම වෛද්ය මණ්ඩලයේ සභාපති අධිකරණ වෛද්ය නිලධාරී (JMO) වෛද්ය ඉලංගරත්න බණ්ඩා මහතා අද (03) කුලියාපිටිය මහේස්ත්රාත් මිහිල් චිරන්තන සතරසිංහ මහතා ඉදිරියේ පෙනී සිටිමින් මේ බව නිල වශයෙන් සාක්ෂි දෙමින් ප්රකාශ කළේය.
මෙම මහේස්ත්රාත් පරීක්ෂණයේදී සාක්ෂි මෙහෙයවූ වයඹ පළාත් භාර ජ්යෙෂ්ඨ නියෝජ්ය පොලිස්පති (SDIG) නීතිඥ අජිත් රෝහණ මහතා, මියගිය පුද්ගලයාගේ සිරුරේ තිබූ කැපුම් තුවාල සහ ජන වහරේ පවතින ‘බලනහර’ කැපීම පිළිබඳව වෛද්ය විද්යාත්මක පසුබිම විමසා සිටියේය. ඊට පිළිතුරු දෙමින් අධිකරණ වෛද්ය ඉලංගරත්න බණ්ඩා මහතා සඳහන් කළේ ‘බලනහර’ නමින් හැඳින්වෙන පදයක් බටහිර වෛද්ය විද්යාවේ පිළි නොගන්නා බවත්, ඒ පිළිබඳව තමා ආයුර්වේද වෛද්ය මහාචාර්යවරුන් සමඟ ද සාකච්ඡා කළ බවත්ය. කෙසේ වෙතත්, සිරුර පිළිබඳව ඉතා සූක්ෂ්ම ලෙස සිදුකළ විශේෂ පශ්චාත් මරණ පරීක්ෂණයේදී, මෙම තුවාල ඔහු විසින්ම සිදුකර ගත් ඒවා බවත්, අධික ලෙස ලේ වහනය වීමෙන් (Excessive loss of blood) ඇතිවූ කම්පනය (Shock) මරණයට හේතුව බවත් විශේෂඥ වෛද්යවරුන් හතරදෙනා නිගමනය කර ඇත.
අද දින නඩු විභාගයේදී මියගිය අයගේ බිරිඳ සහ දියණිය මීට පෙර සාක්ෂි ලබා දී තිබූ අතර, අධිකරණ වෛද්යවරයාට අමතරව මූලස්ථාන පොලිස් පරීක්ෂක කමල් රත්නායක සහ විමර්ශනයට සම්බන්ධ වූ පොලිස් සුනඛයා භාර සැරයන්වරයා ඇතුළු පිරිසකගෙන් සාක්ෂි සටහන් කරගනු ලැබීය. එහිදී මරණකරුගේ ඇඳුම්, පාවහන් සහ තුවාල සිදුකිරීමට යොදාගත් පිහිය අධිකරණය හමුවේ හඳුනාගත් අතර, තුවාලවල ඡායාරූප ද අධිකරණ භාරයට ගන්නා ලදී. රජයේ රස පරීක්ෂක වාර්තාව ලැබුණු පසු අපරාධ නඩු විධාන සංග්රහයේ 30 වන වගන්තිය ප්රකාරව නියෝගයක් නිකුත් කරන ලෙස ජ්යෙෂ්ඨ නියෝජ්ය පොලිස්පතිවරයා කළ ඉල්ලීම සලකා බැලූ කුලියාපිටිය මහේස්ත්රාත්වරයා, නඩුව නැවත එළඹෙන ජූනි 12 වනදා කැඳවීමට නියෝග කළේය.
