ඉන්දියාව සහ ශ්රී ලංකාව අතර පවත්නා සුහද පාර්ලිමේන්තු සබඳතා සහ දිගුකාලීන මිත්රත්වය තවදුරටත් ශක්තිමත් කිරීමට ලබාදුන් සහයෝගය වෙනුවෙන් ශ්රී ලංකාවේ ඉන්දීය නියෝජ්ය මහ කොමසාරිස් වෛද්ය සත්යංජල් පාණ්ඩේ මහතා කථානායකවරයා වෙත සිය කෘතඥතාව පළ කර තිබේ. සිය සේවා කාලය අවසන් කර ධුරයෙන් නික්ම යාමට පෙර නියෝජ්ය මහ කොමසාරිස්වරයා, කථානායක වෛද්ය ජගත් වික්රමරත්න මහතා හමුවූ අවස්ථාවේදී මෙම අදහස් පළ කර ඇත. වෛද්ය පාණ්ඩේ මහතා ශ්රී ලංකාව තුළ ඉටුකළ සේවය කථානායකවරයාගේ ඇගයීමට ලක්වූ අතර, අසීරු අවස්ථාවන්හිදී ඉන්දියාව දුන් සහයෝගය වෙනුවෙන් කථානායකවරයා ද මෙහිදී ඉන්දීය රජයට ස්තුතිය පුද කළේය.
විශේෂයෙන්ම, මෑතකදී මෙරටට බලපෑ සුළි කුණාටුවෙන් පසුව ඉන්දියාව ලබාදුන් සහය මෙන්ම, මැදපෙරදිග කලාපයේ පවතින අර්බුදකාරී තත්ත්වය හේතුවෙන් මතුව ඇති අභියෝග හමුවේ ලබාදෙන අඛණ්ඩ සහයෝගය ද කථානායකවරයාගේ විශේෂ ඇගයීමට ලක්විය. මීට අමතරව පාර්ලිමේන්තු මන්ත්රීවරුන් සහ කාර්ය මණ්ඩලය උදෙසා ඉන්දියාව ලබාදෙන පුහුණු වැඩසටහන් පිළිබඳව ද කෘතඥතාව පළ කෙරුණි.
ධුරයෙන් නික්ම යන නියෝජ්ය මහ කොමසාරිස්වරයා නියෝජ්ය කථානායක වෛද්ය රිස්වි සාලි මහතා ද හමුවූ අතර, දෙරට අතර ද්විපාර්ශ්වික සබඳතා ශක්තිමත් කිරීමට ඒ මහතා දුන් දායකත්වය නියෝජ්ය කථානායකවරයාගේ ද ඇගයීමට ලක්විය. මෙම සුහද හමුවීම්වලදී කථානායකවරයා සහ නියෝජ්ය කථානායකවරයා වෛද්ය පාණ්ඩේ මහතාගේ ඉදිරි කටයුතු සඳහා සුබපැතුම් එක්කළ අතර, නියෝජ්ය මහ කොමසාරිස්වරයා පාර්ලිමේන්තුවේ මහ ලේකම් කුෂානි රෝහණධීර මහත්මිය ඇතුළු කාර්ය මණ්ඩලයට ද සිය ස්තුතිය පළ කළේය.
