‘දිට්වා’ සුළි කුණාටුවෙන් දැඩි ලෙස විනාශයට පත් වූ ඓතිහාසික කොත්මලේ නියම්ගම්දොර පුරාණ රජ මහා විහාරස්ථානයේ ප්රතිසංස්කරණ කටයුතු මෙතෙක් ආරම්භ කර නොමැතිවා පමණක් නොව, සිදු වූ අලාභය තක්සේරු කිරීමට පවා බලධාරීන් මෙතෙක් පියවර ගෙන නොමැති බව විහාරාධිපති, කොත්මලේ පළාතේ උප ප්රධාන සංඝණායක මඩකුඹුරේ ලංකාංග හිමියෝ අද (06) දින මාධ්ය හමුවේ දැඩි කනගාටුවෙන් ප්රකාශ කළහ.
විහාරස්ථානයේදී මාධ්ය වෙත අදහස් දක්වමින් උන්වහන්සේ කියා සිටියේ, දිට්වා සුළි කුණාටුව පැමිණ දැනට මාස 7කට ආසන්න කාලයක් ගතවී ඇතත්, විහාරස්ථානයට සහ අවට ගම්මානවලට සිදු වූ මහා විනාශය පිළිසකර කිරීමට කිසිදු පියවරක් ගෙන නොමැති බවයි. පුරාවිද්යා කොමසාරිස් ජෙනරාල්වරයා, බුද්ධශාසන අමාත්යවරයා සහ නුවරඑළිය දිස්ත්රික් ලේකම්වරිය ඇතුළු වගකිවයුතු ඉහළ නිලධාරීන් රැසකට මේ පිළිබඳව ලිඛිතව දැනුම් දුන්නද ඔවුන්ගෙන් මෙතෙක් කිසිදු ප්රතිචාරයක් ලැබී නොමැති බව උන්වහන්සේ අවධාරණය කළහ.
මෑතකදී නුවරඑළිය දිස්ත්රික් විශේෂ සංවර්ධන කමිටු රැස්වීමට පැමිණි දේශපාලන අධිකාරිය වැවන්ඩන් වත්තේ ජනතාව කඩිනමින් ආරක්ෂිත ස්ථාන කරා යොමු කිරීමට උපදෙස් දීම අගය කරන බව පැවසූ විහාරාධිපති හිමියන්, එවැනි රැස්වීම්වලට පීඩාවට පත් සාමාන්ය ජනතාවට ද සහභාගී වීමට අවස්ථාව ලබා දිය යුතු බව පෙන්වා දුන්හ.
රජයේ වගකිවයුතු බලධාරීන්ගෙන් විහාරස්ථානයට ලැබෙන්නේ “කුඩම්මාගේ සැලකිල්ලක්” බවත්, මෙම ඓතිහාසික ස්ථාන සංවර්ධනය කිරීමට රජයට උවමනාවක් නැත්නම් තවදුරටත් මෙහි රැඳී සිටිනවාද නැද්ද යන්න පිළිබඳව තමන් වහන්සේලාට සෘජුවම දැනුම් දෙන ලෙසත්, එවිට තමන් වහන්සේලා සුදුසු තීරණයක් ගන්නා බවත් උන්වහන්සේ බලධාරීන්ට දැඩිව අවධාරණය කර සිටියහ.
