මැදපෙරදිග කලාපයේ පවතින ගැටුම්කාරී තත්ත්වයන් හේතුවෙන් ශ්රී ලංකාවේ මූලික ආහාර අවශ්යතා සපුරා ගැනීමට නොහැකිව සිටින ජනගහනය තවත් මිලියන 1.3කින් ඉහළ ගොස් ඇති බව එක්සත් ජාතීන්ගේ ලෝක ආහාර වැඩසටහන (WFP) පවසයි.
ලෝක ආහාර වැඩසටහන විසින් ශ්රී ලංකාව, ඇෆ්ගනිස්තානය සහ සෝමාලියාව යන රටවල් කේන්ද්ර කරගනිමින් නිකුත් කළ නවතම විශ්ලේෂණ වාර්තාවකට අනුව මේ බව අනාවරණය වී තිබේ. මැදපෙරදිග අර්බුදය හේතුවෙන් ලෝක වෙළෙඳපොළේ ඉන්ධන මිල ඉහළ යාම ඇතුළු ආර්ථික බලපෑම් මෙලෙස ජනතාවගේ මූලික ආහාර අවශ්යතා බිඳවැටීමට ප්රධානතම හේතුව වී ඇත. මෙම වාර්තාවට අනුව සෝමාලියාවේ මිලියන 2.5ක් සහ ඇෆ්ගනිස්තානයේ මිලියන 2.3ක් වශයෙන් මූලික ආහාර සපුරාගත නොහැකි ජනගහනය ඉහළ ගොස් තිබේ.
ලෝක ආහාර වැඩසටහනේ වැඩබලන විධායක අධ්යක්ෂ කාල් ස්කාව් පෙන්වා දෙන්නේ, මෙම දුප්පත් රටවල බලශක්ති (ඉන්ධන) මිල සහ ආහාර මිල අතර පවතින දැඩි සහසම්බන්ධය හේතුවෙන් මෙම තත්ත්වය උදාවී ඇති බවයි. දුප්පත්ම රටවල ජනතාව තමන් උපයන මුදලින් වැඩි කොටසක් ආහාර සඳහා වියදම් කරන බැවින්, මිල ගණන් ඉහළ යනවිට ඔවුන්ට ආහාර පරිභෝජනය සීමා කිරීමට සිදුව ඇත.
මැදපෙරදිග අර්බුදය ඉදිරියේදී සමනය වුවද, ඉන්ධන මිල ඉහළ යාම සහ වෙළෙඳ කටයුතු බිඳවැටීමේ අහිතකර ප්රතිඵල නිසා ඉදිරි මාස කිහිපය තුළ මෙම රටවල ආහාර අර්බුදය තවදුරටත් තීව්ර විය හැකි බව WFP වාර්තාවේ දැක්වේ. එළඹෙන ජූනි මාසය අවසන් වන විට ලොව පුරා අලුතින්ම මිලියන 45ක ජනතාවක් ආහාර අනාරක්ෂිතතාවයට පත්වීමේ අවදානමක් පවතින අතර, දැනටමත් ආධාර කප්පාදුවලට මුහුණ දී සිටින ලෝක ආහාර වැඩසටහන, මෙම ඛේදජනක මානුෂීය අර්බුදය වළක්වා ගැනීමට කඩිනමින් මැදිහත් වන ලෙස ලෝක ප්රජාවගෙන් ඉල්ලා සිටියි.
