මෙරට මාධ්ය ක්ෂේත්රයේ නියැලී සිටින වෘත්තිකයන් වෙනුවෙන් ඉහළ වෘත්තීය ප්රමිතීන් හඳුන්වා දීම සහ එම ක්ෂේත්රය නියාමනය කිරීම අරමුණු කරගනිමින් “ශ්රී ලංකා වරලත් මාධ්ය වෘත්තිකයන්ගේ ආයතනය” පිහිටුවීමට අදාළ පනත් කෙටුම්පත රජය විසින් නිල ගැසට් පත්රය මගින් ප්රකාශයට පත් කර තිබේ. මෙම නව නීති සම්පාදනය මගින් අදාළ ආයතනය සංස්ථාපිත මණ්ඩලයක් ලෙස ස්ථාපිත කිරීමට නියමිත අතර, මාධ්ය සාමාජිකත්වය නියාමනය කිරීම, වෘත්තීය පුහුණු වැඩසටහන් පැවැත්වීම, විභාග පැවැත්වීම සහ වෘත්තීය ප්රමිතීන් ඉහළ නැංවීම සඳහා වන පූර්ණ බලතල එම ආයතනය සතු වනු ඇත.
මෙම පනත් කෙටුම්පතට අනුව යෝජිත ආයතනයේ ප්රධාන අරමුණු ලෙස සුදුසුකම් ලත් මාධ්ය වෘත්තිකයන් ආයතනය වෙත බඳවා ගැනීම, ඔවුන්ගේ කුසලතා සහ පුහුණුවීම් වර්ධනය කිරීම, මාධ්ය ක්ෂේත්රය පිළිබඳ පර්යේෂණ සිදු කිරීම, වෘත්තීය විනය පවත්වා ගැනීම සඳහා ආචාර ධර්ම පද්ධතියක් හඳුන්වා දීම සහ දේශීය මෙන්ම ජාත්යන්තර මාධ්ය ආයතන සමඟ සහයෝගීතාව ප්රවර්ධනය කිරීම ඇතුළත් වේ. මෙම ආයතනයේ පරිපාලන කටයුතු පාලන සභාවක් (Governing Council) මගින් මෙහෙයවීමට නියමිත අතර, ස්ථිර පාලන සභාවක් පිහිටුවන තෙක් අදාළ අමාත්යවරයා විසින් පත් කරනු ලබන අතුරු පාලන සභාවක් (Interim Council) මගින් ආරම්භක කටයුතු අධීක්ෂණය කෙරෙනු ඇත.
මෙම නව වෘත්තීය නියාමන ව්යුහය සඳහා මාධ්යවේදීන්, සංස්කාරකවරුන්, ප්රකාශකයන්, විකාශකයන්, පුවත් ඉදිරිපත් කරන්නන් (Anchors/Presenters), මාධ්ය ආයතන හිමිකරුවන්, මාධ්ය කළමනාකරුවන්, මාධ්ය අධ්යාපනඥයින්, පර්යේෂකයන්, තාක්ෂණික ශිල්පීන්, අන්තර්ගත නිර්මාණකරුවන් (Content Creators), අන්තර්ගත සංස්කාරකවරුන්, කැමරා ශිල්පීන් සහ ඡායාරූප ශිල්පීන් ඇතුළු පුළුල් පරාසයක මාධ්ය ක්ෂේත්රයේ නියුතු පිරිසක් ඇතුළත් වේ.
