පාස්කු ඉරිදා මරාගෙන මැරෙන බෝම්බ ප්රහාරයේ ප්රධාන මහමොළකරු වන සහරාන් හෂීම්ගේ නීතිඥවරයා ලෙස තමන් කටයුතු කර ඇති බවට සමාජ මාධ්ය හා විවිධ වේදිකා ඔස්සේ පැතිර යන ප්රචාරයන් මුළුමනින්ම අසත්ය, ද්වේෂ සහගත සහ නොමඟ යවන සුළු ප්රකාශ බව පවසමින් ජනාධිපති නීතිඥ මෛත්රී ගුණරත්න මහතා විශේෂ නිවේදනයක් නිකුත් කරමින් දැඩි ප්රතික්ෂේප කිරීමක් සිදුකර තිබේ. තමන් මාධ්යවේදීන් යැයි කියාගන්නා තරිඳු උඩුවරගෙදර, ශාලික විමලසේන, නන්දන වීරරත්න සහ සිසිර සෙන්පති කහවත්ත යන පුද්ගලයන් ඇතුළු පිරිසක් විසින් මෙම වෛරී සහගත ප්රචාරයන් සංවිධානාත්මකව සමාජගත කරමින් සිටින බව හිටපු ආණ්ඩුකාරවරයෙකු ද වන ජනාධිපති නීතිඥවරයා පෙන්වා දෙයි.
සිය නිවේදනය මඟින් කරුණු පැහැදිලි කරන මෛත්රී ගුණරත්න මහතා අවධාරණය කරන්නේ, අධිකරණ ක්රියාවලියකදී ඕනෑම නීතිඥවරයෙකුට උසාවියට සහාය වීමේ වෘත්තීය අයිතියක් සහ හැකියාවක් පවතින නමුත්, තමන් කිසිසේත්ම පෙනී නොසිටි සැකකරුවෙකු වෙනුවෙන් පෙනී සිටි බවට සමාජය හමුවේ මඩ ගැසීම නින්දිත ක්රියාවක් බවයි. තමන් සිදුකරනු ලබන සිවිල් සමාජ ක්රියාකාරකම් සහ දේශපාලන අවශ්යතාවන් හේතුවෙන් තමන් කෙරෙහි වෛරය පැතිරවීමට මෙම පිරිස උත්සාහ කරන බව පවසන ඒ මහතා, තමන් සහරාන් වෙනුවෙන් පෙනී සිටියේ නම් ඊට අදාළ නඩුවේ අංකය (Case number) සහ එම නඩුව විභාගයට ගත් නිශ්චිත අධිකරණය (Court) ප්රසිද්ධියේ හෙළි කර එය ඔප්පු කර පෙන්වන ලෙස තරිඳු උඩුවරගෙදර සහ ශාලික විමලසේන යන අයට සෘජුවම අභියෝග කර සිටියි.
පාස්කු බිහිසුණු ප්රහාරය සිදුවීමට බොහෝ කාලයකට පෙර, සහරාන් හෂීම් ද එක් සැකකරුවෙකු කර තිබූ පැරණි නඩුකරයක තමන් වෙනත් සැකකරුවෙකු වෙනුවෙන් පෙනී සිටි බව සැබෑ වුව ද, එම සැකකරු කිසිලෙසකින් හෝ පාස්කු ප්රහාරයේ මහමොළකරු වන සහරාන් නොවන බව ඔහු තරයේ කියා සිටියි. මෙවැනි වෛරී සහගත සහ මඩ ප්රචාරයන් මඟින් තමන් දැනට රට වෙනුවෙන් සිදුකරනු ලබන සිවිල් සමාජ ක්රියාකාරීත්වය සහ දේශපාලන මැදිහත්වීම් කිසිසේත්ම නතර කළ නොහැකි බව ද ජනාධිපති නීතිඥ මෛත්රී ගුණරත්න මහතා වැඩිදුරටත් අවධාරණය කරයි.
