පාස්කු ප්රහාරය සම්බන්ධයෙන් පසුගිය කාලයේ ගොඩනැගුණු “කුමන්ත්රණ න්යායන්” මගින් බෞද්ධයන් සහ කතෝලිකයන් අතර පවතින සාමකාමී සහජීවනය විනාශ කර, සිංහල සමාජය දුර්වල කිරීමේ කුමන්ත්රණයක් ක්රියාත්මක වන බව පිවිතුරු හෙළ උරුමයේ නායක උදය ගම්මන්පිල මහතා පවසයි. ඒ මහතා මේ බව සඳහන් කළේ අද (15) පැවැති මාධ්ය හමුවකට එක්වෙමිනි.සුරේෂ් සලේ මහතාට වද හිංසා කිරීමට එරෙහිව අස්ගිරි මහානායක ස්වාමීන් වහන්සේ ප්රකාශයක් නිකුත් කර ඇති අතර, කාදිනල් හිමිපාණන් ඊට පටහැනිව අදහස් දක්වා තිබීම මත, බුද්ධ ශාසනය සහ කතෝලික පල්ලිය අතර ගැටුමක් දක්වා මෙම තත්ත්වය වර්ධනය වෙමින් පවතින බව ගම්මන්පිල මහතා පෙන්වා දුන්නේය.කතෝලික පල්ලිය තුළ අධිපති බලයක් පතුරුවාගෙන සිටින ඇතැම් පියතුමන්ලා ඇතුළු රාජ්ය නොවන සංවිධාන (NGO) කල්ලියක්, පාස්කු ප්රහාරයේ වගකීම මුස්ලිම් අන්තවාදීන්ගෙන් ඉවත් කර බෞද්ධයන් වෙත පැටවීමට උත්සාහ කරන බවට ඔහු චෝදනා කරයි.
පාස්කු විමර්ශනවලට සම්බන්ධ සැකකරුවන් ලෙස නම් කර සිටි පුද්ගලයන් දෙදෙනෙකු පොලිස් අමාත්යාංශයේ ලේකම් ධුරයට සහ රහස් පොලිස් අධ්යක්ෂ ධුරයට පත් කිරීම ලෝක ඉතිහාසයේ ප්රථම වතාවට සිදුවූ අරුම පුදුම සිදුවීමක් බව ගම්මන්පිල මහතා අවධාරණය කරයි. මේ සම්බන්ධයෙන් කාදිනල් හිමිපාණන්ගේ වුවමනාව කුමක්දැයි ඔහු ප්රශ්න කරයි.
පසුගිය ජනාධිපතිවරණ සමයේදී රාජපක්ෂවරුන්ව බලයට පත් කිරීමට ඊබ්රාහිම් නානා දායක වූ බවට මතයක් ප්රචාරණය කළද, ඔහුට කිසිදු දේශපාලන සැලකීමක් නොලැබුණු බව ගම්මන්පිල මහතා පවසයි. එහෙත් වත්මන් ජනාධිපති අනුර දිසානායක මහතා ප්රමුඛ මාලිමාව, ඊබ්රාහිම් නානාට අයත් දේපල නැවත භාරදීම සහ ඔහුට එරෙහි නඩුවේ තීරණාත්මක සාක්ෂිකාරිය විදෙස්ගත වීමට ඉඩහැරීම මගින් “කළගුණ සැලකීමේ” අපූර්ව ක්රමයක් අනුගමනය කරන බව ඔහු උපහාසාත්මකව පවසයි.
