2026 අයවැය යටතේ වෙන් කරන ලද ප්රතිපාදන උපරිම ලෙස උපයෝජනය කරන ලෙසත්, කෘෂිකර්ම සහ කර්මාන්ත අංශවල තරුණ ව්යවසායකයන් වෙනුවෙන් ලබා දෙන අඩු පොලී බැංකු ණය පහසුකම් තවදුරටත් තරුණයන් අතර ප්රවර්ධනය කිරීමටත් ජනාධිපති අනුර කුමාර දිසානායක මහතා උපදෙස් දී තිබේ.
කෘෂිකර්ම, පශු සම්පත්, ඉඩම් සහ වාරිමාර්ග අමාත්යාංශයේ ව්යාපෘති ප්රගතිය සමාලෝචනය කිරීම සඳහා අද (07) ජනාධිපති කාර්යාලයේ පැවති සාකච්ඡාවේදී ජනාධිපතිවරයා මෙම උපදෙස් ලබා දුන්නේය.
වාරි ව්යාපෘති කළමනාකරණය: එක් එක් ආයතන හා පළාත් පාලන ආයතන මගින් නඩත්තු කරන සියලු වාරි ව්යාපෘති දිස්ත්රික් මට්ටමින් ස්ථාපිත ඒකකයක් මගින් නියාමනය කිරීමටත්, වාරි ප්රතිසංස්කරණ සිතියම්ගත කිරීමටත් තීරණය කෙරිණි.
ව්යාප්ත සේවාවන් ඒකාබද්ධ කිරීම: විවිධ අමාත්යාංශ යටතේ පවතින ව්යාප්ත සේවාවන් විධිමත් ලෙස ඒකාබද්ධ කර පවත්වාගෙන යාමට යෝජනා වාර්තාවක් කැඳවීමට පියවර ගෙන ඇත.
අපනයන කෘෂිකර්මාන්තය: අපනයන කෘෂි බෝග ප්රවර්ධනය සහ ඒ ආශ්රිත නිෂ්පාදන ඉහළ නැංවීම සඳහා නව ව්යාපෘති ඉදිරිපත් කිරීමට උපදෙස් ලබා දෙන ලදී.
විදේශ ආධාර ව්යාපෘති: කාලසීමාව ඉක්මවා ගිය විදේශ ණය ආධාර යටතේ ආරම්භ කළ ව්යාපෘති කඩිනමින් අවසන් කරන ලෙසත්, අනාගතයේදී අවසාන ප්රතිඵලය පිළිබඳ පැහැදිලි අවබෝධයකින් තොරව කිසිදු ව්යාපෘතියක් අනුමත නොකරන ලෙසත් අවධාරණය කෙරිණි.
ප්රතිඵල රහිත වැඩසටහන්: දිගු කලක් තිස්සේ ප්රතිඵල රහිතව පවත්වාගෙන යන යල් පැන ගිය ව්යාපෘති වෙනුවට වඩාත් ඵලදායී කෘෂිකාර්මික වැඩසටහන් හඳුන්වා දීමේ වැදගත්කම සාකච්ඡා විය.
කෘෂිකර්ම, පශු සම්පත්, ඉඩම් සහ වාරිමාර්ග අමාත්ය කේ.ඩී. ලාල්කාන්ත මහතා ඇතුළු අමාත්යවරුන්, රාජ්ය නිලධාරීන් සහ අමාත්යාංශ ලේකම්වරුන් මෙම අවස්ථාවට එක්ව සිටියහ.
