වී අලෙවි මණ්ඩලය මගින් එළැඹෙන සඳුදා (13) සිට වී මිලදී ගැනීම් ආරම්භ කිරීමට සැලසුම් කර ඇති බව එම මණ්ඩලයේ සභාපති මංජුල පින්නලන්ද මහතා පවසයි. රජයේ ප්‍රවෘත්ති දෙපාර්තමේන්තුවේ අද (10) පැවැති මාධ්‍ය හමුවකදී ඒ මහතා මේ බව අනාවරණය කළේය.
වැඩිම වී අස්වනු නෙළන ප්‍රදේශ ආශ්‍රිතව වී ගබඩා විවෘත කරමින් මෙම වැඩපිළිවෙළ ක්‍රියාත්මක කෙරෙන අතර, විශේෂයෙන්ම උතුරු, නැගෙනහිර සහ අම්පාර දිස්ත්‍රික්කවලට මුල්තැන ලබා දෙන බව සභාපතිවරයා සඳහන් කළේය.
වී අලෙවි මණ්ඩලය විසින් නාඩු වී කිලෝවක් රුපියල් 120කටත්, සම්බා වී කිලෝවක් රුපියල් 130කටත්, කීරි සම්බා වී කිලෝවක් රුපියල් 140ක් වැනි මිලකටත් මිලදී ගැනීමට නියමිතය. වී මිලදී ගැනීම සඳහා රට පුරා ස්ථාන 143ක ගබඩා පහසුකම් සැලසුම් කර ඇති අතර, ගබඩා පිරී ගියහොත් පෞද්ගලික අංශයේ ගබඩා ද භාවිතා කිරීමට සාකච්ඡා කර තිබේ.
මෙම කටයුතු සඳහා රජය මගින් රුපියල් මිලියන 6,000ක මුදලක් ලබා දී ඇති අතර, ඊට අමතරව ‘ඔඩපන’ ණය යෝජනා ක්‍රමය යටතේ රුපියල් මිලියන 10,000ක් වෙන් කර ඇත. එමගින් කුඩා හා මධ්‍ය පරිමාණ වී මෝල් හිමියන්ට වී තොග රැස් කර ගැනීමට පහසුකම් සලසා දී ඇති අතර, සමස්ත ක්‍රියාවලිය ගොවිජන සංවර්ධන දෙපාර්තමේන්තුව මගින් අධීක්ෂණය කරනු ලබයි.
