මීගමුව බන්ධනාගාරයේ ඇති වූ නොසන්සුන්කාරී තත්ත්වයේදී එහි රැඳවියන් නිලධාරීන්ට පහරදීම සඳහා යොදාගත් බවට සැකකෙරෙන තියුණු ආයුධ සහ අවි ගබඩාවක් පොලිස් විමර්ශනවලදී සොයාගෙන තිබේ. මෙම ගැටුමෙන් බන්ධනාගාර නිලධාරීන් අට දෙනෙකු සහ රැඳවියන් විසි එක් දෙනෙකු ජීවිතක්ෂයට පත්වීමත් සමඟ අතිශය ඛේදජනක තත්ත්වයක් උද්ගත විය.
පොලිසිය සහ අපරාධ පරීක්ෂණ දෙපාර්තමේන්තුව සිදුකළ පුළුල් පරීක්ෂාවන්හිදී, බන්ධනාගාරය තුළ සඟවා තිබූ පොලුමුගුරු දහසකට අධික ප්රමාණයක්, යකඩ පොලු සහ තියුණු ආයුධ රැසක් සොයාගෙන ඇත. රැඳවියන් ගැටුම අතරතුර බන්ධනාගාර මුළුතැන්ගෙය කඩා දමා එහි තිබූ පිහි ඇතුළු උපකරණ තියුණු ආයුධ ලෙස යොදාගෙන ඇති අතර, මුළුතැන්ගෙයි තිබූ පොල්ගෙඩි පවා නිලධාරීන්ට පහරදීම සඳහා භාවිතා කර ඇති බව විමර්ශනවලදී අනාවරණය වී තිබේ.
මෙම සිදුවීමෙන් අනතුරුව මීගමුව බන්ධනාගාරයේ සිටි රැඳවියන් වෙනත් බන්ධනාගාර වෙත මාරු කිරීමට කටයුතු යොදා ඇතත්, එම බන්ධනාගාරවල පවතින ඉඩකඩ සීමිත වීම නිසා නව ගැටලුකාරී තත්ත්වයන් මතුව තිබේ. විශේෂයෙන්ම මාරු කර යවන ලද රැඳවියන්ට එම බන්ධනාගාරවල සිටින සෙසු රැඳවියන් විසින් පහරදීමේ සිදුවීම් වාර්තා වීම නිසා බන්ධනාගාර පද්ධතිය තුළ තවදුරටත් නොසන්සුන්කාරී වාතාවරණයක් පවතින බව වාර්තා වේ.
