බ්රිතාන්ය රජය විසින් ඉරාන විප්ලවීය ආරක්ෂක බලකාය (IRGC) සහ ඊට අනුබද්ධ කණ්ඩායමක් බ්රිතාන්යයේ ජාතික ආරක්ෂාවට තර්ජනයක් ලෙස නිල වශයෙන් නම් කිරීමට ගත් පියවරට එරෙහිව ඉරානය සිය විරෝධය පළ කර තිබේ. ඒ සම්බන්ධයෙන් කරුණු විමසීම සඳහා ඉරානය එරට සිටින බ්රිතාන්ය තානාපතිවරයා කැඳවීමට පියවර ගෙන ඇත.
බ්රිතාන්යයේ “රාජ්ය තර්ජන මර්දන පනත” යටතේ මෙම නම් කිරීම සිදු කර ඇති අතර, පසුගිය මාස කිහිපය තුළ යුරෝපය පුරා ප්රහාර එල්ල කිරීම සඳහා ඉරානය විසින් සිය සටන්කාමී කණ්ඩායම් මෙහෙයවා ඇති බවට බ්රිතාන්ය රජය චෝදනා කරයි. මෙම චෝදනා පදනම් කරගනිමින් මීට පෙර ලන්ඩන් නුවර සිටින ඉරාන තානාපති කාර්යාලයේ වැඩබලන ප්රධානී අලි නසීම්ෆර් කැඳවීමට ද බ්රිතාන්යය පියවර ගෙන තිබුණි.
විදේශීය රාජ්යයන් විසින් ඔත්තු බැලීම සහ කඩාකප්පල්කාරී ක්රියා සඳහා සටන්කාමී කණ්ඩායම් යොදා ගැනීම වැළැක්වීමේ අරමුණින් බ්රිතාන්යය විසින් මෑතකදී හඳුන්වා දුන් නව පනත හරහා මෙම පියවර ගෙන ඇති අතර, මෙම සිදුවීම් මාලාවත් සමඟ දෙරට අතර පවතින රාජ්ය තාන්ත්රික සබඳතා තවදුරටත් දැඩි නොසන්සුන්කාරී මුහුණුවරක් ගෙන ඇති බව විදෙස් මාධ්ය වාර්තා කරයි.
