ත්රිකුණාමලය උණුදිය ළිං පරිශ්රයේ පිහිටි පැරණි ස්ථූපයේ ඇරඹි සංරක්ෂණ කටයුතු සඳහා ප්රාදේශීය සභාවේ අනුමැතියක් ලබාගත යුතු බවට ඉලංගෙයි තමිල් අරසු කච්චි බලය හිමි ත්රිකුණාමලය නගර හා කඩවත් ප්රාදේශීය සභාවේ පසුගියදා පැවැති මාසික සැසියේදී ඉදිරිපත් කළ යෝජනාවක් නිසා සභාවේ කටයුතු දැඩි වාග් ප්රහාර මධ්යයේ පැය තුනකට ආසන්න කාලයක් උණුසුම් වී ගිය බව වාර්තා වේ.
පුරාවිද්යා දෙපාර්තමේන්තුවට වසර 136ක් පිරීම නිමිත්තෙන් ඉකුත් 22 වැනිදා සංරක්ෂණ ඇරඹි මෙම ස්ථූපයේ කටයුතු සඳහා ප්රාදේශීය සභාවේ අනුමැතිය අවශ්ය බවට සභාපති වෙල්ලතම්බි සුරේෂ් කුමාර් මහතාගේ ප්රධානත්වයෙන් රැස්වූ අවස්ථාවේදී මන්ත්රී පාල්රාජ් රාජ්කුමාර් (එස්.පී.රාජු) ඇතුළු පිරිසක් මෙම යෝජනාව ඉදිරිපත් කරමින් අදාළ ස්ථානයේ මීට පෙර හින්දු කෝවිලක් තිබූ බවද පෙන්වා දුන්හ.
මෙම යෝජනාවට දැඩි ලෙස විරුද්ධ වූ ස්වාධීන මන්ත්රී සඳුන් දර්ශන රත්නායක මහතා, පුරාවිද්යා පනත ප්රකාරව සංරක්ෂණ කටයුතු සඳහා ප්රාදේශීය සභාවේ අනුමැතියක් අවශ්ය නොවන බව පෙන්වා දුන් අතර, අදාළ ස්ථානයේ කෝවිලක් නොතිබුණු බවත් අධිකරණ තීන්දුවක් අනුව වෙනත් ස්ථානයක් වෙන් කර තිබුණද එහි කෝවිලක් ඉදි නොවීම ගැනද ප්රශ්න කළේය.
එමෙන්ම, ජාතික ජන බලවේගයේ මන්ත්රී සජිත් ලක්මාල් මහතාද ප්රකාශ කළේ මෙම ස්ථානයේ කෝවිලක් නොතිබුණු බවත්, මෙය ජාතිවාදය වැපිරීම සඳහා පදනම් විරහිතව කරන ප්රකාශ බවත්ය. පුරාවිද්යා දෙපාර්තමේන්තුව මඟින් සංරක්ෂණය කෙරෙන මෙම ස්ථානය කිසිදු ආගමකට හෝ ජනවර්ගයකට සීමා නොවන බවද ඔහු අවධාරණය කළේය.විපක්ෂයේ මන්ත්රීවරුන් දිගින් දිගටම දැක්වූ දැඩි විරෝධය සහ කරුණු දැක්වීම් හමුවේ අදාළ ආපසු හැරවීමේ යෝජනාව ඉවත් කර ගැනීමට සභාපතිවරයා අවසානයේ කටයුතු කළ අතර, මෙම උණුසුම් තත්ත්වය හේතුවෙන් සභාවේ සාමාන්ය න්යායපත්රානුකූල කටයුතු ආරම්භ කිරීමට පැය කිහිපයක ප්රමාදයක්ද සිදුවිය.
