2019 වසරේ එල්ල වූ ම්ලේච්ඡ පාස්කු ඉරිදා ත්රස්ත ප්රහාරයට අදාළව මෑතකදී ලබා දුන් අධිකරණ තීන්දුව අන්තවාදී මතවාදයන්ට එරෙහිව ලැබුණු යුක්තියක් වුවද, එය සමස්ත ප්රහාරයටම අදාළ එක නඩුවක් පමණක් බව පෙන්වා දෙන කතෝලික සභාවේ ජාතික මාධ්ය ප්රකාශක සිරිල් ගාමිණී ප්රනාන්දු පියතුමා, මෙම මහා ව්යසනය පිටුපස සිටි සැබෑ මහ මොළකරුවන් සහ කුමන්ත්රණකරුවන් කවුරුන්ද යන්න අනාවරණය කර ගන්නා තෙක් විමර්ශන අඛණ්ඩව ඉදිරියට ගෙන යා යුතු බව දැඩිව අවධාරණය කර සිටියි.
සහරාන් ඇතුළු පිරිසට එරෙහි නඩුව නිමාවට පත්වුවද, වින්දිතයන් වෙනුවෙන් ගොනු කර ඇති නඩු, චැනල් 4 හෙළිදරව්වට අදාළ මහේස්ත්රාත් පරීක්ෂණ සහ බුද්ධි තොරතුරු ලැබී තිබියදීත් රාජකාරිය පැහැරහළ නිලධාරීන්ට එරෙහි නීතිමය ක්රියාමාර්ග තවදුරටත් ක්රියාත්මක විය යුතුව ඇති බව උන්වහන්සේ පෙන්වා දෙති. ප්රහාරය වළක්වා ගැනීමට තිබූ අවස්ථා මඟහැරී යාම සහ මූල්යමය හා බුද්ධිමය අනුග්රහය ලබා දුන් පාර්ශ්වයන් හඳුනා ගැනීම රටේ ජාතික ආරක්ෂාව සහ අනාගතය වෙනුවෙන් අත්යවශ්යම කාරණයක් බව පියතුමා වැඩිදුරටත් පෙන්වා දී ඇත.
මෙම විමර්ශන කිසිදු දේශපාලන බලපෑමකට හෝ මැදිහත්වීමකට යටත් නොවිය යුතු අතර, රටේ නීතිය සැමට එක ලෙස ක්රියාත්මක වන බව තහවුරු කරමින් මියගිය සහ ආබාධිත වූ සියලු වින්දිතයන්ට සැබෑ සාධාරණත්වය ඉටු වන තෙක් කතෝලික සභාව නීතියේ ආධිපත්යය වෙනුවෙන් අඛණ්ඩව පෙනී සිටිනු ඇත.
