ධීවර, ජලජ හා සාගර සම්පත් අමාත්‍යාංශය විසින් වෙන් කරන ලද රුපියල් මිලියන 1134ක ප්‍රතිපාදන යටතේ සංවර්ධන කටයුතු සිදු වෙමින් පවතින වාලච්චේන ධීවර වරාය ව්‍යාපෘතියේ වත්මන් ප්‍රගතිය සොයා බැලීම සඳහා නියෝජ්‍ය අමාත්‍ය රත්න ගමගේ මහතා ඊයේ (29) විශේෂ නිරීක්ෂණ චාරිකාවක නිරත විය. මෙහිදී වරාය ජැටි ප්‍රවේශ මාර්ගය, ආරක්ෂිත බැම්ම ඉදිකිරීම මෙන්ම ඊට සමගාමීව ක්‍රියාත්මක වන සෙසු ප්‍රතිසංස්කරණ කටයුතුවල ගුණාත්මකභාවය සහ ප්‍රගතිය පිළිබඳව අමාත්‍යවරයා දැඩි අවධානයක් යොමු කරමින් අදාළ නිලධාරීන් දැනුවත් කිරීමට කටයුතු කර ඇත.
දශක ගණනාවක් පුරා මෙරට ආර්ථිකයේ ප්‍රධාන කුළුණක් වන ධීවර කර්මාන්තය නඟා සිටුවීම සහ වෙරළබඩ ප්‍රජාවගේ ජීවන තත්ත්වය උසස් කිරීම අරමුණු කරගනිමින් ක්‍රියාත්මක වන මෙම ව්‍යාපෘතියේ ක්‍රියාකාරීත්වය සම්බන්ධයෙන් වරාය පරිශ්‍රයට පැමිණ සිටි ධීවර ප්‍රජාව හමුවී සුහද සාකච්ඡාවක නිරත වීමට ද නියෝජ්‍ය අමාත්‍යවරයා පියවර ගත්තේය. එහිදී ධීවර කර්මාන්තයේ නියැලීමේදී ඔවුන් මුහුණ දෙන ගැටලු සහ අභියෝග පිළිබඳව දීර්ඝ වශයෙන් විමසා බැලූ අතර, කර්මාන්තකරුවන්ගේ දෛනික ජීවිතයට සහ ව්‍යාපාරික කටයුතුවලට සෘජුව බලපාන එම ගැටලු කඩිනමින් විසඳීම සඳහා ගත යුතු ඉදිරි ක්‍රියාමාර්ග පිළිබඳව ද නිලධාරීන් වෙත උපදෙස් ලබා දී තිබේ.
මෙම අවස්ථාව සඳහා ධීවර වරාය නීතිගත සංස්ථාවේ සභාපති, ධීවර ජලජ හා සාගර සම්පත් අමාත්‍යාංශයේ අධ්‍යක්ෂ ජනරාල් (ඉංජිනේරු), වාලච්චේන ධීවර වරායේ කළමනාකාර ඇතුළු නිලධාරීන් මෙන්ම ප්‍රාදේශීය ධීවර නියෝජිතයින් පිරිසක් ද සහභාගී වී සිටි අතර, ඉදිරියේදීත් මෙවැනි සංවර්ධන ව්‍යාපෘති ක්‍රමවත් ලෙස අධීක්ෂණය කරමින් ධීවර ප්‍රජාවගේ සුබසාධනය තහවුරු කිරීමට අමාත්‍යාංශය අඛණ්ඩව කටයුතු කරනු ඇත. දේශීය ධීවර ක්ෂේත්‍රයේ යටිතල පහසුකම් සංවර්ධනය කරමින් ජාතික ආර්ථිකයට ධීවර ප්‍රජාවගෙන් ලැබෙන දායකත්වය තවදුරටත් පුළුල් කිරීම රජයේ ප්‍රධාන අරමුණ වී තිබේ.
