විපක්ෂ නායක සජිත් ප්‍රේමදාස මහතා සහ ශ්‍රී ලංකාවේ ප්‍රංශ තානාපති රෙමී ලැම්බර්ට් මහතා අතර හමුවක් අද (02) පැවැත්වී තිබේ.
ශ්‍රී ලංකාවේ පුනර්ජනනීය බලශක්ති ක්ෂේත්‍රය මුහුණ දෙන අභියෝග සහ එම අංශයේ ආයෝජන පුළුල් කිරීමේ අවස්ථා පිළිබඳව මෙහිදී සාකච්ඡා කර ඇති බව සඳහන් වේ.
2030 වනවිට මෙරට විදුලි අවශ්‍යතාවයෙන් 70%ක් පුනර්ජනනීය බලශක්ති ප්‍රභවයන්ගෙන් සපුරාලීමේ ඉලක්කය ඇතුළු ජාතික බලශක්ති අරමුණු සපුරා ගැනීමේ වැදගත්කම පිළිබඳවද සජිත් ප්‍රේමදාස මහතා අවධාරණය කර තිබේ.
එමෙන්ම වහල මත සවි කරන සූර්ය පැනල සඳහා ක්‍රියාත්මක වන Net Metering සහ Net Accounting ක්‍රමවලින් Net Plus ක්‍රමය වෙත මාරුවීම, ගෙවීම් සහ ගිණුම්කරණ ක්‍රමවේදවල වෙනස්කම්, බලපත්‍ර නිකුත් කිරීමේ ප්‍රමාද සහ අනෙකුත් නියාමන බාධක පිළිබඳවද මෙහිදී අවධානය යොමු කර ඇත. මෙම කරුණු සම්බන්ධයෙන් සූර්ය බලශක්ති ක්ෂේත්‍රයේ පාර්ශ්වකරුවන් මීට පෙරද කනස්සල්ල පළ කර තිබේ.
පුනර්ජනනීය බලශක්ති ආයෝජන සඳහා පුරෝකථනය කළ හැකි ප්‍රතිපත්තිමය පරිසරයක් මෙන්ම ස්ථාවර විදුලි ගාස්තු පවත්වාගෙන යාමේ වැදගත්කම පිළිබඳවද සාකච්ඡා කර ඇති බව වාර්තා වේ.
