මහරගම නගර සභාවේ ඊයේ (06) පැවති මාසික සභා රැස්වීම දැඩි උණුසුම් මුහුණුවරක් ගනිමින් දෙපාර්ශ්වය අතර ගැටුමකින් කෙළවර වීමත් සමඟ දේශපාලන හා පරිපාලනමය මට්ටමින් දැඩි ආන්දෝලනයක් මතු කර තිබේ. උපසභාපතිනී රංජනී නාවුරුන්නගේ මහත්මියගේ ප්‍රධානත්වයෙන් නගර සභා ශ්‍රවණාගාරයේදී රැස්වීම ආරම්භ වූ අවස්ථාවේදී, විපක්ෂයේ මන්ත්‍රීවරුන් අදහස් දක්වන අවස්ථාවලදී පාලක පක්ෂයේ මන්ත්‍රීවරයකු අසභ්‍ය වචන භාවිත කරමින් සහ පුද්ගලික චෝදනා නඟමින් නිරන්තර බාධා එල්ල කිරීම මෙම ගැටුමට මුලික හේතුව වී තිබේ.
සර්වජන බලය පක්ෂයේ නාගරික මන්ත්‍රී සමන් සේනාධීර සහ ස්වාධීන මන්ත්‍රී සුනිල් කොඩිතුවක්කු යන මහත්වරුන් මීට එරෙහිව දැඩි විරෝධය පළ කිරීමත් සමඟ සභා ගර්භය තුළ උණුසුම් වාතාවරණයක් හටගත් අතර, පාලක පක්ෂයේ මන්ත්‍රී ලාල් බංගමුව මහතා සහ විපක්ෂයේ මන්ත්‍රීවරුන් අතර ඇති වූ උණුසුම් වචන හුවමාරුව දුරදිග යෑමෙන් පාලක පක්ෂයේ මන්ත්‍රීවරයාට එල්ල වූ ප්‍රහාරයක් හේතුවෙන් ඔහු කළුබෝවිල ශික්ෂණ රෝහලට ඇතුළත් කර ප්‍රතිකාර ලබන බව වාර්තා වේ. අනතුරුව මූලාසනය මැදිහත්වී සභාව කෙටි වේලාවකට කල් තැබීමට පියවර ගත්තද, පළාත් පාලන ආයතනයක් තුළ මන්ත්‍රීවරුන් මට්ටමින් මෙგකාරයේ ගැටුම් ඇති වීම ප්‍රජාතන්ත්‍රවාදී පරිපාලන සංස්කෘතියට එල්ල වූ බරපතළ කළුចීයක් ලෙස පුරවැසියන්ගේ විවේචනයට ලක්ව තිබේ.
පළාත් පාලන ආයතනවල මන්ත්‍රීවරුන්ගේ වගකීම සහ විනය පිළිබඳ ගැටළුව මෙම සිදුවීම හරහා යළිත් වරක් ජාතික මට්ටමේ කතාබහකට ලක්ව ඇති අතර, ඉදිරියේදී නගර සභා අභ්‍යන්තරයේ විනය පවත්වාගෙන යාම සහ මන්ත්‍රීවරුන්ගේ ආරක්ෂාව තහවුරු කිරීම සඳහා අදාළ බලධාරීන් කුමන ආකාරයේ විනයානුකූල ක්‍රියාමාර්ග අනුගමනය කරනු ඇත්ද යන්න පිළිබඳව දැඩි අවධානයක් යොමු වී තිබේ.
