මෙරට පොදු ප්‍රවාහන සේවයට එක් කළ මෙට්‍රො බස් ව්‍යාපෘතිය විධිමත් අධ්‍යයනයකින් තොරව ක්‍රියාත්මක කිරීම හේතුවෙන් මහජන මුදල් නාස්තියක් සහ අක්‍රමිකතා සිදුවන බවට පාර්ලිමේන්තු මන්ත්‍රී ජගත් විතාන මහතා චෝදනා කරයි.
මන්ත්‍රීවරයා පවසන්නේ මෙට්‍රො බස් රථයක් කිලෝමීටරයක් ධාවනය කිරීම සඳහා ඩීසල් ලීටර් දෙකක් පමණ වැය වන බවයි. එවැනි ඉන්ධන පරිභෝජනයක් සහිත බස් රථ භාවිත කිරීම බලශක්ති නාස්තියක් බව ද ඔහු පෙන්වා දෙයි.
තවද, මගීන් 40 දෙනෙකුට පමණ ගමන් කිරීමේ පහසුකම් ඇති බව කියන මෙම බස් රථවල මගීන් 80 දෙනෙකු පමණ ගෙන යන තත්ත්වයක් පවතින බව මන්ත්‍රීවරයා සඳහන් කරයි. සාමාන්‍ය බස් ගාස්තුව මෙන් දෙගුණයක මුදලක් අය කරන අතරම, හිඳගෙන සහ හිටගෙන ගමන් කරන මගීන්ගෙන් එකම ගාස්තුවක් අය කිරීම අසාධාරණ බව ද ඔහුගේ අදහසයි.
එමෙන්ම, පූජ්‍ය පක්ෂය සඳහා ආසන වෙන්කර නොතිබීම හේතුවෙන් භික්ෂූන් වහන්සේලා ඇතුළු පූජකවරුන්ට ද හිටගෙන ගමන් කිරීමට සිදුවන බවට ද ඔහු චෝදනා කර තිබේ.
මෙට්‍රො බස් ව්‍යාපෘතියට අදාළ අමතර කොටස්, ටයර් සහ ටියුබ් මිලදී ගැනීමේදී සියයට 15ත් 35ත් අතර කොමිස් මුදල් හුවමාරු වන බවට ද ජගත් විතාන මහතා චෝදනා කරයි. ටෙන්ඩර් ක්‍රියාවලිය සහ අඩු කාලයකින් ගෙවී යන ටයර් භාවිතය හේතුවෙන් ශ්‍රී ලංකා ගමනාගමන මණ්ඩලයට පාඩු සිදුවන බව ද ඔහු පවසයි.
කළුතර දිස්ත්‍රික්කයේ පානදුර, හොරණ, මතුගම, බණ්ඩාරගම සහ කළුතර ඩිපෝවල බස් රථ නඩත්තු කිරීම හා පිරිසිදු කිරීම සඳහා අවශ්‍ය මූලික පහසුකම් පවා ප්‍රමාණවත් නොවන බවට ද මන්ත්‍රීවරයා චෝදනා කර ඇත.
පොදු ප්‍රවාහන ක්ෂේත්‍රයේ පවතින ගැටලු සහ අක්‍රමිකතා විසඳීම සඳහා තමන් වැටුපක් හෝ නිල වාහනයක් අපේක්ෂා නොකර උපදෙස් සහ තාක්ෂණික දැනුම ලබාදීමට සූදානම් බව ද ඔහු වැඩිදුරටත් ප්‍රකාශ කර තිබේ.
