කසළ බැහැර කිරීම හේතුවෙන් විනාශ වෙමින් පැවති මහරගම, නාවින්න ප්‍රදේශයේ භූමියක් නවීන පහසුකම් සහිත මහජන ක්‍රීඩාංගණයක් බවට පත් කිරීමේ ව්‍යාපෘතියේ වත්මන් ප්‍රගතිය අමාත්‍ය සුනිල් කුමාර ගමගේ මහතාගේ නිරීක්ෂණයට ලක්ව තිබේ.
පොදු ක්‍රීඩාංගණ සංවර්ධනය කිරීමේ ජාතික වැඩපිළිවෙළ යටතේ ක්‍රියාත්මක මෙම ව්‍යාපෘතිය සඳහා මුල්ගල් තබා ඇත්තේ 2025 නොවැම්බර් 13 වැනිදාය.
මේ වන විට ව්‍යාපෘතිය සඳහා රුපියල් මිලියන 80ක පමණ මුදලක් වැය කර ඇති අතර, ඉදිකිරීම් අවසන් වන විට සමස්ත වියදම රුපියල් මිලියන 200ක් පමණ වනු ඇති බව අමාත්‍යවරයා සඳහන් කර තිබේ.
එළඹෙන දෙසැම්බර් මාසය වන විට ඉදිකිරීම් අවසන් කර ක්‍රීඩාංගණය ජනතා අයිතියට පත් කිරීමට සැලසුම් කර ඇත. එය විවෘත කිරීමෙන් පසු ප්‍රදේශවාසීන්ට, ක්‍රීඩක ක්‍රීඩිකාවන්ට සහ තරුණ තරුණියන්ට නොමිලේ එහි පහසුකම් භාවිත කිරීමට අවස්ථාව හිමිවන බවද සඳහන් වේ.
මෙම අවස්ථාවට පාර්ලිමේන්තු මන්ත්‍රී දේවානන්ද සුරවීර මහතා, මහරගම නගර සභාවේ සභාපති සමන් සමරකෝන් මහතා ඇතුළු පිරිසක් එක්ව සිටියහ.
