පටු දේශපාලන පැත්තකින් තබා එකමුතුව ත්‍රස්තවාදයට මුහුණ දිය යුතුයි – අගමැති

පටු දේශපාලන භේද, මතිමතාන්තර පසෙක තබා පවතින නීති රාමුව තවදුරටත් ශක්තිමත් කර ගනිමින් සියලු දෙනා එකමුතුව ත්‍රස්තවාදයට මුහුණදිය යුතු බව අග්‍රාමාත්‍ය රනිල් වික්‍රමසිංහ මහතා පවසයි.

අග්‍රාමාත්‍යවරයා අද (08) පාර්ලිමේන්තුවේදී ජනතා විමුක්ති පෙරමුණේ නායක, පාර්ලිමේන්තු මන්ත්‍රී අනුර කුමාර දිසානායක මහතා පාර්ලිමේන්තුවේ දී නැගූ ප්‍රශ්නවලට පිළිතුරු ලබාදෙමින් කියා සිටියේ ප්‍රතිත්‍රස්ත පනත පිළිබඳව ගෝනි බිල්ලෙකු මවා පෑමට කිසිදු අවශ්‍යතාවයක් නොමැති බවයි.

ශ්‍රී ලංකා වාසී ජනතාව පාර්ලිමේන්තුව නියෝජනය කරන මන්ත්‍රීවරු 225 දෙනාගෙන් ඉල්ලා සිටින්නේ ත්‍රස්තවාදය පරාජය කිරීම සඳහා එක්ව කටයුතු කරන ලෙස බව පැවසූ වික්‍රමසිංහ මහතා ඒ අපේක්ෂාවන් ඉටුකරලීම සඳහා කඩිනමින් ප්‍රතිත්‍රස්ත පනත පොදු එකඟතාවයකින් සම්මත කර ගැනීමට සහාය වන ලෙස සියලු දෙනාගෙන් ඉල්ලා සිටින බව පැවසීය.

අග්‍රාමාත්‍ය රනිල් වික්‍රමසිංහ මහතා තවදුරටත් මෙසේද කීය.

ගරු කතානායකතුමනි,

පසුගියදා සිදුවූ ප්‍රහාර මාලාවෙන් අනතුරුව කිහිප වාරයක්ම ඒ සම්බන්ධව පාර්ලිමේන්තුවත් ජනතාවත් දැනුවත් කිරීමට මා පියවර ගත්තා. එසේම, ඊයේ දිනයේ මේ පිළිබඳව සවිස්තරාත්මක ප්‍රකාශයක් මා පාර්ලිමේන්තුවේදී සිදු කළා. පොලිස්පතිතුමා විසින් ඉදිරිපත් කරන ලද වාර්තා සභාගත කිරීමටත් කටයුතු කළා.

මා ඊයේ දින සිදුකරන ලද ප්‍රකාශයේ දී මෙම ප්‍රහාරවල පසුබිම මෙන්ම ජාත්‍යන්තර ත්‍රස්තවාදී සංවිධානයක කටයුතු පිළිබඳව දීර්ඝ විස්තරයක් සිදු කළා. ගරු අනුර කුමාර දිසානායක මැතිතුමා විසින් අසන ලද මුල් ප්‍රශ්න 05 සඳහාම පිළිතුරු මගේ එම ප්‍රකාශයේ සවිස්තරාත්මකව සඳහන් වෙනවා. එම නිසා එම ප්‍රශ්න සඳහා නැවත පිළිතුරු දීමට මා බලාපොරොත්තු වන්නේ නැහැ. ඒ සම්බන්ධව පොලිස්පතිතුමා විසින් මා වෙත ලබා දී ඇති වාර්තාවක් මා සභාගත කරනවා.

ගරු කතානායකතුමනි,
එවකට යාපනය නගරාධිපතිව සිටි ඇල්ෆ්‍රඩ් දොරේඅප්පා මහතා 1975 වසරේ ජූලි මාසයේ ඝාතනය කිරීමත් සමඟ ආරම්භ වූ ත්‍රස්තවාදී කටයුතු පාලනය කිරීමට අවශ්‍ය නීතිරීති අපට තිබුණේ නැහැ. දණ්ඩ නීති සංග්‍රහයේ විධිවිධාන පමණයි පැවතුනේ. ඒ අනුව තමයි 1979 වසරේදී අප ත්‍රස්තවාදය වැලැක්වීමේ පනත හඳුන්වා දුන්නේ. ශ්‍රී ලංකාවේ අප සම්මත කළ 1979 අංක 48 දරණ ත්‍රස්තවාදය වැලැක්වීමේ පනතේ 02 වන වගන්තියෙන් ත්‍රස්තවාදය වරදක් ලෙස අර්ථ නිරූපනය කළා. නමුත් මෙය ශ්‍රී ලංකාවේ භූමිය තුළ කරන වැරදි වලට පමණක් සීමා වුණා.

1971 උතුරු අයර්ලන්තයේ ත්‍රස්තවාදී කටයුතු ආරම්භ වන විට ඒවා මර්ධනය කිරීමට එංගලන්තයට නීති තිබුණේ නැහැ. 1974 එක්සත් රාජධානියේ ත්‍රස්තවාදය වැළැක්වීම තාවකාලික විධිවිධාන පනත අනුවත් බලය තිබුනේ උතුරු අයර්ලන්තයට සම්බන්ධ ත්‍රස්ත ක්‍රියාවන්ට එරෙහිව කටයුතු කිරීමට පමණයි. 2000 වර්ෂයේ සිට 2015 දක්වා බ්‍රිතාන්‍ය පාර්ලිමේන්තුව ත්‍රස්තවාදය මර්ධනය සඳහා අණපනත් ගණනාවක් හඳුන්වා දුන්නා. මෙහිදී ඔවුන් උතුරු අයර්ලන්තයේ ක්‍රියාත්මක වූ ත්‍රස්තවාදී කටයුතු මැඩලීමට මෙන්ම ජාත්‍යන්තර වශයෙන් ක්‍රියාත්මක ත්‍රස්තවාදී කටයුතු මර්ධනය සඳහාත් ප්‍රමුඛත්වය දුන්නා. එම අණපනත්වල ලේඛනයක් මම සභාගත කරනවා.

විශේෂයෙන්ම 2001 සැප්තැම්බර් 11 ලෝක වෙළෙඳ මධ්‍යස්ථානයට පහර දීමත්, 2005 ජූලි 07 වෙනිදා ලන්ඩන් බෝම්බ සිද්ධියත් ත්‍රස්තවාදයට එරෙහි ගෝලීය ක්‍රියාමාර්ග ගැනීම සඳහා බලපෑවා. 2000 වර්ෂයේ පනවන ලද ත්‍රස්ත පනත පළවෙනි වතාවට ත්‍රස්තවාදය යන්නට පුළුල් අර්ථ කථනයක් ලබා දුන්නා. 2001 සැප්තැම්බර් 11 සිදුවීමෙන් පසුව 2001 වසරේ එක්සත් රාජධානියේ ප්‍රතිත්‍රස්ත, අපරාධ හා ආරක්ෂක පනත සම්මත කළා. 2006 ත්‍රස්තවාදී පනත, 2005 ජූලි 07 ලන්ඩන් බෝම්බ සිද්ධියෙන් පසුව ත්‍රස්තවාදී කටයුතු වීරකම් ලෙස හුවා දැක්වීම වරදක් බවට නීති සකස් කළා. Glorifying the Terrorism was made an offence. එසේම ත්‍රස්තවාදය පිළිබඳ අර්ථ නිරූපණ කිහිපවතාවක් සංශෝධනය කළා.

ගරු කතානායකතුමනි,

අද අප මුහුණ දෙන්නේ සාම්ප්‍රදායික ගරිල්ලා යුද්ධ උපක්‍රම වලට නොවේ. අද යුද්ධය සාම්ප්‍රදායික යුධ භූමියෙන් එහාට ගොස් තිබෙනවා. ත්‍රස්තවාදියෙක් වාහනයක් පදවාගෙන ගොස් මිනිසුන් සමූහයක ජීවිත හානි සිදුකළහොත් එය තවදුරටත් මෝටර් රථ වාහන පනත යටතේ වන වරදක් ලෙස සැලකීමට නොහැකියි. එය ත්‍රස්තවාදී ක්‍රියාවක්. දඩුවම් ලබා දිය යුත්තේ එම ත්‍රස්තවාදී වරදටයි. ඒ නිසයි මේ අලුත් තත්ත්වයන්ට මුහුණදීමට ප්‍රතිත්‍රස්ත පනත සකස් කිරීමට අවශ්‍ය වුණේ. ඒ වගේම, ගෝලීය ත්‍රස්තවාදයට මුහුණදීමට ශ්‍රී ලංකාවේ නීති ප්‍රමාණවත් නොවන නිසා තමයි ප්‍රතිත්‍රස්ත පනත කෙටුම්පත් කළේ. මේ සඳහා මූලික සාකච්ඡා වට ගණනාවක් අප පැවැත්වූවා. 2016 වසරේ ගරු සාගල රත්නායක මැතිතුමා නීතිය හා සාමය පිළිබඳ අමාත්‍යවරයා ලෙස කටයුතු කළ කාලයේ විශේෂඥයන්ගේ සහාය ඇතිව මේ පිළිබඳ සංකල්ප පත්‍රිකාවක් සම්පාදනය කළා. එයට එවකට ආරක්ෂක ලේකම්, නීතිය හා සාමය අමාත්‍යාංශයේ ලේකම්, පොලිස්පති මෙන්ම එවකට අතිරේක සොලිසිටර් ජෙනරාල් ඇතුලු විද්වතුන් පිරිසක් දායක වුණා. එය පදනම් කරගෙන නීති කෙටුම්පත් සම්පාදක පනත කෙටුම්පත් කළා. අමාත්‍ය මණ්ඩලයේ නිර්දේශ අනුව එය ගැසට් කරලා පාර්ලිමේන්තුවට ඉදිරිපත් කළා. එය දැන් පාර්ලිමේන්තුවේ ආංශික අධීක්ෂණ කමිටුවේ නිර්දේශ සඳහා ඉදිරිපත් කර තිබෙන්නේ. දැන් ඒ සම්බන්ධ කටයුතු විදේශ කටයුතු අමාත්‍ය තිලක් මාරපන ඇමතිතුමා විසින් සිදු කරනු ලබනවා.

මේ කාලය තුළ නොයෙකුත් හේතු නිසා මේ කාරණාවට බාධා සිදු වුණා. ස්වභාවික ආපදා, ව්‍යසන වගේම 2018 ඔක්තෝබර් 26 දේශපාලන කුමන්ත්‍රණ ආදී මේ හැමදේම විවිධාකාරයෙන් බලපෑම් එල්ල කළා. අද විවිධ නීති විශාරදයන්, සමහර අය වැස්සකටවත් උසාවියකට ගොඩ නොවූ නිතීඥවරු, ගෝලීය ත්‍රස්තවාදය වැළැක්වීමට ශ්‍රී ලංකාවේ පවතින නීති ප්‍රමාණවත් යැයි පවසනවා.

ගරු කතානායකතුමනි,

ප්‍රශ්නය වන්නේ විදේශයක දී කළ ත්‍රස්තවාදී කටයුත්තක් සඳහා නඩු පැවරීමටත්, ඒ සඳහා සාක්ෂි රැස් කිරීමටත් අපට පුළුවන් ද යන්නයි. ත්‍රස්තවාදීන්ට සහන පැකේජයක් ලබාදීම ලෙස ප්‍රතිත්‍රස්ත පනත හඳුන්වන අයත්, ඒ වගේම ප්‍රතිත්‍රස්ත පනත හරහා ගෝනිබිල්ලන් මවන අයත් දෙගොල්ලන්ම කරන්නේ ගෝලීය ත්‍රස්තවාදයට උඩගෙඩි දීමක්.

මම මේ යෝජිත ප්‍රති ත්‍රස්ත පනත් කෙටුම්පතේ, පනත අදාළ වීම පිළිබඳ කියවෙන දෙවැනි වගන්තියේ කොටසක් කියවන්න කැමතියි.

“2. (1) (අ) ශ්‍රී ලංකා ජනරජයට අයත් දේශය තුළ හෝ ඉන් පිටත දී මේ පනත යටතේ වරදක් සිදු කරන ලබන ශ්‍රී ලංකාවේ යම් පුරවැසියෙකුට ;
(i) ශ්‍රී ලංකාව තුළ දී සම්පූර්ණයෙන්ම හෝ කොටසක් හෝ සිදු කරන යම් තැනැත්තෙකුට;
(ii) ශ්‍රි ලංකාවේ දේශීය ජල තීරය තුළ දී හෝ එයට ඉහළින් සිදු කරන යම් තැනැත්තෙකුට;
(iii) ශ්‍රී ලංකාවේ ගුවන් තලයේ සිදු කරන යම් තැනැත්තෙකුට;
(iv) ශ්‍රී ලංකාවේ ලියාපදිංචි ශ්‍රී ලංකා රජයට අයත් හෝ ශ්‍රී ලංකා රජය විසින් භාවිතා කරනු ලබන හෝ කරන ලද හෝ ගුවන් යානයක හෝ නැවක සිට හෝ එබඳු ගුවන් යානයක් හෝ නැවක් සම්බන්ධයෙන් හෝ සිදු කරන යම් තැනැත්තෙකුට; ”

එසේම මම මේ යෝජිත ප්‍රතිත්‍රස්ත පනත් කෙටුම්පතේ තුන්වෙනි වගන්තියේ ත්‍රස්තවාදී වරද සම්බන්ධ නිර්වචනය ඉදිරිපත් කරන්න කැමතියි.

“ 3. (1) (අ) ජනගහනයක් බිය ගැන්වීමේ අරමුණින් යුතුව;
(ආ) යම් ක්‍රියාවක් සිදු කිරීමට හෝ සිදුකිරීම වැළැක්වීමට ශ්‍රී ලංකාවේ ආණ්ඩුව හෝ වෙනත් යම් ආණ්ඩුවක් හෝ ජාත්‍යන්තර සංවිධානයක් සාවද්‍ය ලෙස හෝ නීති විරෝධී ලෙස පෙළඹවීමේ අරමුණින් යුතුව;
(ඇ) එවැනි යම් ආණ්ඩුවක්, කටයුතු ඉටු කිරීම වැළැක්වීමේ අරමුණින් යුතුව; හෝ
(ඇ) ශ්‍රී ලංකාවේ හෝ වෙනත් යම් ස්වෛරී රටක භෞමික අඛණ්ඩතාවයට හෝ ස්වෛරීබවට හානි සිදුකිරීමේ අරමුණින් යුතුව,
(2) වන උපවගන්තියේ සඳහන් යම් ක්‍රියාවක් සිදුකරනු ලබන යම් තැනැත්තෙකු ත්‍රස්තවාදී වරදට වරදකරු වන්නේය.”

I would like to remind that there are ongoing conflicts with competing power centres in Syria. The USA, Russia, Turkey etc., have all intervened. We also do not want to get drawn into such a situation. Therefore, the Defence Lawyers can contend that there is no central power or authority in Syria and this provision does not apply to a civil conflict intertwined with terrorism.

But Section 3 of the Counter Terrorism Bill states …. “Intimidating a population” and Section 2.1 ….

Therefore, it is clear that all those who have returned from Syria are within the ambit of the Counter Terrorism Bill.

ගරු කතානායකතුමනි,

මම අහන්න කැමතියි මේකේ ත්‍රස්තවාදීන්ට දෙන සහන පැකේජය මොකක්ද කියලා. ප්‍රභාකරන්ට පස්සේ එල්ටීටීඊ නායකයා වෙච්චි කේ.පී. ලංකාවට ගෙනල්ලා සියලු සැප සම්පත් දුන්නු එකයි සහන පැකේජය. මේකේ කිසිම ත්‍රස්තවාදියෙකුට සහන පැකේජයක් නැහැ. ශ්‍රී ලංකාවේ මෙන්ම විදේශයක දී සිදු කරන ත්‍රස්තවාදී ක්‍රියාවන් ලංකාවේ නීතියට අනුව වරදක් බවට පත් කිරීමට අවශ්‍ය පසුබිම මේ තුන්වෙනි වගන්තියේ නිර්වචනය මඟින් ඇති කරලා තියෙනවා. ඒ නිසා ගෝනිබිල්ලෙක් මවා පෑමට කිසිම අවශ්‍යතාවයක් නැහැ. මේ නිසා අප විසින් සිදු කළ යුත්තේ පටු දේශපාලන භේද මති මතාන්තර පසෙක තබා පවතින නීති රාමුව ශක්තිමත් කර ගනිමින් එකමුතුව ත්‍රස්තවාදයට මුහුණ දීමයි. අද ශ්‍රී ලංකාවේ ජනතාව මේ පාර්ලිමේන්තුවේ සිටින මහජන නියෝජිතයන් 225 දෙනාගෙන් ඉල්ලා සිටින්නේ එයයි. ඒ සඳහා ප්‍රතිත්‍රස්ත පනත පොදු එකඟතාවයෙන් ඉදිරි දිනක දී සම්මත කරගැනීමට සහාය වන ලෙස මා සියලු දෙනාගෙන් ඉල්ලා සිටිනවා.

මීට අමතරව තවත් නීති වුවමනා වනවා නම් අප එම නීති ද සම්පාදනය කිරීමට පියවර ගත යුතුයි. ප්‍රචණ්ඩත්වය හා අන්තවාදය නැති කිරීමට අප සූදානම්. මෙම ප්‍රතිත්‍රස්ත පනතේ වගන්ති පිළිබඳව ගැටලු තිබෙනවා නම් ඒ ගැන අප සාකච්ඡා කර සංශෝධන ඉදිරිපත් කරමු.

නමුත් මෙහි දෙවන සහ තුන්වැනි වගන්ති මෙම නීතියට ඇතුළත් කළ යුතුයි. මේ අනුව මෙම ප්‍රතිත්‍රස්ත පනත සම්මත කර ගැනීමට අප එක්ව පියවර ගනිමු.