මිලියන 22 ක් වූ ජනතාවගේ යහපත උදෙසා සෞඛ්‍ය ආරක්ෂාවට මුල් තැන දෙමින් සංචාරක කර්මාන්තය හා අනෙකුත් දෛනික කටයුතු සදහා රට විවෘත කළ යුතු සේම ආයෝජනයටත් ඉඩ ප්‍රස්ථාව සලසා දිය යුතු බව ග්‍රාමීය මාර්ග හා අවශේෂ යටිතල පහසුකම් රාජ්‍ය අමාත්‍ය නිමල් ලාන්සා මහතා පවසයි.
රාජ්‍ය අමාත්‍ය නිමල් ලාන්සා මහතා මෙම අදහස් පළ කර සිටියේ ඊයේ (30) මිනුවන්ගොඩ මාර්ග සංවර්ධන ව්‍යාපෘති ආරම්භ කිරීමේ අවස්ථාවකට සහභාගි වෙමිනි.
එහිදී වැඩිදුරටත් අදහස් දැක්වූ රාජ්‍ය අමාත්‍ය නිමල් ලාන්සා මහතා, “ අපි මේ සෑම කටයුත්තක්ම කරන්නේ ලෝකයම මුහුණ දී තිබෙන අසාමාන්‍ය තත්ත්වයක් තුළ. අපි මෙවැනි තත්ත්වයකට කවදාවත් මුහුණ දීලා තිබුනෙ නැහැ. යුද්ධය පැවති කාලයටත් වඩා ඉතා අමාරු තත්ත්වයකට මුහුණ දීලා ඉන්නේ. යුද්ධය අවසන් කරන්න මහින්ද රාජපක්ෂ මහතාට, ගෝඨාභය රාජපක්ෂ මහතාට හැකියාව ලැබුනා. දැන් කොරෝනා එක පරද්දන්න සියලු දෙනා යුද්ධය කාලේ එකතු වුනා වගේ එකතු වෙන්න ඕනේ. ලෝකයේ බලවත්, ධනවත් රටවල් අතුරින් අපි කොරෝනා මර්ධනය හා අවම කිරීම අතින් 10 වෙනි ස්ථානයේ ඉන්නේ. ඒක අපි ලද විශාල ජයග්‍රහණයක්.
ලෝකයේ බිලියන 7කට වැඩි ජනතාවගේ කැමැත්ත කොවිඩ් අඩු වෙනවට, හැබැයි අපේ විපක්ෂයේ බලාපොරොත්තුව කොරෝනා වැඩිවෙලා, රෝහල්වල ධාරිතාවය වැඩිවෙලා, මිනිස්සු මිය යනවට.
විපක්ෂය යුද්ධය දිනන්න බැහැ කීවා. කොරෝනා එක පාලනය කරන්න බැහැ කීවා. විපක්ෂය ගොඩක් දුක්වුන දවස තමා ඉන්දියාවේ විදේශ අමාත්‍යතුමා ලංකාවට ඇවිල්ලා කොරෝනා එන්නත ලංකාවට දෙනවා කියලා කියපු දවස. අතිගරු ජනාධිපති ගෝඨාභය රාජපක්ෂ මහතා රාජ්‍ය තාන්ත්‍රිකව පවත්වන සබදතා හේතුවෙන් තමා ඉන්දියාව, චීනය, රුසියාව හා ලෝක සෞඛ්‍ය සංවිධානය කොවිඩ් එන්නත අපේ රටට ලබා දෙන්න කටයුතු කරන්නේ.
කොළඹ වරායේ නැගෙනහිර පර්යන්තය සම්බන්ධයෙන් ඉන්දියාවෙන් ආයෝජනයක් ඇවිල්ලා තියෙනවා. මේකට සමහර සංවිධාන විරෝධතාවය පල කරනවා. අතිගරු ජනාධිපති ගෝඨාභය රාජපක්ෂ මහතා පැහැදිලිව කියලා තියෙනවා අපේ රටේ සම්පත් විකුණන්නෙත් නැහැ. බදු දෙන්නෙත් නැහැ කියලා. සියයට 49 ක් ආයෝජනයට දෙන එකටත් විරුද්ධයි. සංචාරකයො එන්නේ නැතිනම්, ආයෝජන එන්නේ නැතිනම් රුපියල අවප්‍රමාණය වෙනවා. ඩොලරය ඉහළ යනවා. භාණ්ඩ හා සේවා මිල ඉහළ යනවා. සිංගප්පුරුව, මැලේසියාව, ඩුබායි වැනි රටවල් දියුණු වුනා කියලා කතා කරනවා. එයාලා ආයෝජකයින්ට අවස්ථාව දීලා තියෙනවා. ලෝකයේ සියළු රටවල් ආයෝජනයට අවස්ථාව දීලා තියෙනවා. සියයට 49 නෙමේ සියයට 100 දක්වා දීලා තියෙනවා. ඒකයි ඒ රටවල් දියුණු වෙලා තියෙන්නේ. මෙහෙ ඉන්න විපක්ෂය, ඇතැම් පිරිස් මිලියන 22 ක් අපේ රටේ ජනතාව අමාරුවේ දාන්න හදන්නේ.
පසුගිය අවුරුදු 70 ක් හිටපු නායකයින්ට බනිනවා මුකුත් කලේ නැහැ කියලා. ඒ එක නායකයකුටවත් මේ සමහර සංවිධාන වැඩ කරන්න දුන්නේ නැහැ. ඒ නිසා රට ආපස්සට ගියා යැයි” අමාත්‍යවරයා කීය.
