පොදු ජන පෙරමුණේ ඒ සඳහා වගකිව යුතු කණ්ඩායම් සමඟ හෝ ඔවුනගේ ආශිර්වාදයෙන් තම බලය රැක ගන්නා කිසිදු දේශපාලනඥයෙක් සමඟ සමගි ජන බලවේගය හෝ සමගි ජන සන්ධානය එකතුව දේශපාලනයේ නිරත නොවන බව සමගි ජන බලවේගයේ මහ ලේකම් රංජිත් මද්දුම බණ්ඩාර මහතා පවසයි.
ඒ මහතා මාධ්‍ය නිවේදනයක් නිකුත් කරමින් මෙසේ වැඩිදුරටත් සඳහන් කර සිටියේය.
සමගි ජන බලවේගය සමග සන්ධානගතව ඇති ප්‍රධාන දේශපාලන පක්ෂ සහ සමගි ජන බලවේගය අතර මතවාදී ගැටුම් ඇති බවට වූ සංවිධානාත්මක ප්‍රචාරයක් ජනාධිපතිවරයාට සම්බන්ධ මාධ්‍ය ජාලා මගින් සිදුකරන බව නිරීක්ෂණය වී තිබේ. සමගි ජන සන්ධානයට සම්බන්ධ සියලු දේශපාලන පක්ෂ සමගි ජන බලවේගය සමඟ වර්තමාන ජනතා පීඩක පාලනයෙන් රට මුදවා ගැනීම සඳහා ගෙවී ගිය කාලසීමාව තුළ පාර්ලිමේන්තුව තුළ සහ ඉන් පිටත සිදු කරනු ලබන ප්‍රජාතන්ත්‍රීය ක්‍රියාදාමයන් තුළ රටේ ජනතාව සමගි ජන සන්ධානය වටා ඒකරාශී වීම ආණ්ඩුවේ බලධාරීන්ට වාර්තා වීම මෙම වැඩපිළිවෙළ සංවිධානය කිරීමට ප්‍රධාන සාධකයක් බව හෙළිදරව් වී ඇත. යෝජිත ජනාධිපතිවරණය සහ මහ මැතිවරණයේදී ජන පීඩක ආණ්ඩුවට විරෝධී දේශපාලන පක්ෂ සහ සිවිල් සංවිධාන රැසක් සමගි ජන සන්ධානය සමඟ එකතුවීමට කරනු ලබන කතාබහ සාර්ථක වීමද මෙවැනි අසත්‍ය ප්‍රවෘත්ති නිර්මාණය කොට ප්‍රචාරය කිරීමට හේතු වී තිබේ.
ජනාධිපතිවරයාගේ සහ වර්තමානයේ ජනාධිපතිවරයාට ශක්තියක් වී ඇති පොදු ජන පෙරමුණේ මන්ත්‍රී කණ්ඩායම අයවැය විවාදය තුළදී දිගින් දිගටම සමග ජන බලවේගය නායක සජිත් ප්‍රේමදාස මැතිතුමා ඉලක්ක කර ගනිමින් ක්‍රියාකළ අයුරු රහසක් නොවේ. වර්තමානයේ රට මුහුණ දී ඇති අභියෝග සඳහා පිළිතුරු නොමැතිව ජනතාව මත බර පටවමින් ක්‍රියා කරන ආණ්ඩුවේ ක්‍රියා පිළිවෙතට එරෙහිව සාධනීය සහ පිළිගත හැකි විවේචන ඉදිරිපත් කරමින් සමගි ජන සන්ධානය සහ එහි නායකයින් ක්‍රියාකරන ආකාරය තුළ ජනාධිපතිවරයා ප්‍රමුඛ පොදුජන පෙරමුණේ මන්ත්‍රීන් තිගැස්සීමට සහ භීතියකට ලක්ව ඇති බව ඉතාමත් පැහැදිලිය. මේ සඳහා ඔවුන් තෝරාගත් විකල්පය වූයේ සජිත් ප්‍රේමදාස මැතිතුමාට සහ සමගි ජන සන්ධානයේ නායකයින් ඉලක්ක කර ගනිමින් අසත්‍ය ප්‍රවෘත්ති නිර්මාණය කිරීම සහ ඒවා දිගින් දිගටම තමාට හිතැති මාධ්‍ය සහ සමාජ මාධ්‍ය හරහා ජනගත කිරීමයි.
ඒ සඳහා ගොබෙල්ස් පන්නයේ කණ්ඩායමක්ද පූර්ණ රාජ්‍යනුග්‍රහය ඇතිව ක්‍රියාත්මක වන බව අවධාරණය කරමු.මෙවැනි ක්‍රියාදාමයන් පොදු ජන පෙරමුණට සහ එම පෙරමුණේ ජනාධිපතිවරයා වන වර්තමාන ජනාධිපතිවරයාට සුපුරුදු දේශපාලන ක්‍රියාවන් වේ. තර්කානුකූල නොවන බලය සඳහාම වූ ජනතාවගේ බුද්ධියට නිගා කරන මෙවැනි නිර්මාණාත්මක ප්‍රවෘත්ති ඉදිරියේදීද මාධ්‍ය හරහා ජනගත කිරීමට ඔවුන් ක්‍රියා කරනු ඇත.එවැනි ලද බොළඳ ක්‍රියා තුළින් සමගි ජන සන්ධානය සහ එහි නායකත්වය ගැන ජනතාව තුළ විචිකිච්චාවන් නිර්මාණය කිරීමට දරන ප්‍රයත්නයන් පිළිකුලින් යුතුව හෙලා දකිමු.
එමෙන්ම මෙම කණ්ඩායමේ දේශපාලනය මෙරට බුද්ධිමත් ජනතාව ප්‍රතික්ෂේප කොට ඇති බව ඔවුන් දැන්වත් වටහා ගත යුතුය. සමගි ජන බලවේගයට සහ සමගි ජන සන්ධානයට අවශ්‍ය වන්නේ රට බංකොලොත් කළ ශ්‍රේෂ්ඨාධිකරණය විසින්ම වැරදිකරුවන් බවට පත්කළ දේශපාලනය සහ එම පිරිස රැකගැනීමට උත්සහ දරන දේශපාලනය සහ නායකත්වය දේශපාලනය තුළින් ඉවත් කිරීමයි.රට බංකොලොත් කළ දේශපාලකයින්ට සහ ඒ සඳහා අනුබල දුන් සියලු දෙනාම නීතිය හමුවට කැඳවීමයි.
ඔවුන් රැකගනිමින් ක්‍රියාකරන්නවුන් සහ එම දේශපාලනය නිමාවට පත්වන දිනය වැඩි ඈතක නොවේ. එමෙන්ම රට බංකොලොත් කළ මේ රටේ දෙකෝටියක් වූ ජනතාවගේ ජීවිත අඳුරට පත්කළ දූෂණය සහ භීෂණය තම දේශපාලනයට අවියක් කරගත් පොදු ජන පෙරමුණේ ඒ සඳහා වගකිව යුතු කණ්ඩායම් සමඟ හෝ ඔවුනගේ ආශිර්වාදයෙන් තම බලය රැක ගන්නා කිසිදු දේශපාලනඥයෙක් සමඟ සමගි ජන බලවේගය හෝ සමගි ජන සන්ධානය එකතුව දේශපාලනයේ නිරත නොවන බව අවධාරණය කරමු.
රංජිත් මද්දුම බණ්ඩාර
මහ ලේකම්
සමගි ජන බලවේගය
