රේගු දෙපාර්තමේන්තුවට හොර රහසේ මෙරටට ආනයනය කරන ලද රුපියල් කෝටි ගණනක් වටිනා මොන්ටේරෝ, ලෑන්ඩ්කෘසර් වර්ගයේ සුඛෝපභෝගී මෝටර් රථ 200කට අධික සංඛ්‍යාවක් ව්‍යාජ දත්ත ඇතුළත් කර නාරාහේන්පිට මෝටර් රථ දෙපාර්තමේන්තුවේ දත්ත පද්ධතියේ ලියාපදිංචි කර ඇති බව කියන සිද්ධියක් සම්බන්ධයෙන් කරුණු දැක්වීම සඳහා එම දෙපාර්තමේන්තුවේ නියෝජ්‍ය කොමසාරිස්වරයෙකු හා සහකාර කොමසාරිස්වරුන් දෙදෙනකු ඇතුළු එහි කාර්ය මණ්ඩලයේ නිලධාරීන් 8 දෙනකුට නොවැම්බර් 29 වන දා අධිකරණය හමුවේ පෙනී සිටින ලෙස දන්වමින් නොතීසි නිකුත් කර තිබේ.
කොළඹ ප්‍රධාන මහේස්ත්‍රාත් තිළිණ ගමගේ ඊයේ (නොවැ.19) නියෝගයක් නිකුත් කරමින් මේ බව සඳහන් කළේ ය.
ඉහත සඳහන් කොමසාරිස්වරුන් තිදෙනාට අමතරව එම සිද්ධියට සම්බන්ධ බව කියන පරිගණක දත්ත පද්ධති ක්‍රියාකරුවෙකු, වාහන අංක නිකුත් කළ අයෙකු, වාහන ආනයනය කිරීමට සහාය ලබා දුන් අයෙකු සංවර්ධන නිලධාරියෙකු ඇතුළු එම අංශයේ නිලධාරීන් 8 දෙනෙකුට අධිකරණය හමුවේ පෙනී සිටින ලෙස දන්වා එසේ නොතීසි නිකුත් කෙරිණි.
එම දෙපාර්තමේන්තුවේ දත්ත පද්ධතිය නිවැරදි ආකාරයෙන් පවත්වාගෙන යන ලෙසට දෙපාර්තමේන්තුවට දැනුම් දී ඇතත්, එවැනි නිවැරදි කිරීමක් මෙතෙක් සිදුකර නොමැති බවට කරුණු අනාවරණය වන බව එම නඩුව ඊයේ අධිකරණය හමුවේ නැවැත කැඳවූ අවස්ථාවේදී අල්ලස් හෝ දූෂණ විමර්ශන කොමිෂන් සභාවේ නිලධාරීන් අධිකරණයට දැන්වීය.
එම කරුණ ඇතුළු සිද්ධියට අදාළ වෙනත් කරුණු විමසීම සඳහා ඉහත සඳහන් නිලධාරීන් අටදෙනා අධිකරණය වෙත කැඳවීමට නියෝගයක් ලබාදෙන ලෙසට එම කොමිෂන් සභාවේ නිලධාරීන් අධිකරණයට කරන ලද කරුණු පිළිබඳව අවධානය යොමු කරමින් මහෙස්ත්‍රාත්වරයා එසේ ඔවුන්ට නොතීසි නිකුත් කළේ ය.
රුපියල් කෝටි 500කට අධික බදු මුදල් රජයට අහිමි කරමින් සුඛෝපභෝගී මෝටර් රථ දෙසීයක් පමණ මෙරටට ආනයනය කර ඇති බව මෙතෙක් සිදු කළ විමර්ශනවලදී අනාවරණය වී ඇති බව ද ඉන් මෝටර් රථ 16ක් මේ වන විට අත්අඩංගුවට ගෙන ඇති අතර අධිකරණ නියෝග මත එම වාහන රේගුව භාරයේ රඳවා තබා ඇති බව ද එම නිලධාරීන් අධිකරණයට දැක්වූ කරුණුවලින් හෙළි විය.
මෝටර් රථ ප්‍රවාහන දෙපාර්තමේන්තුවේ පරිගණක පද්ධතියට ව්‍යාජ තොරතුරු ඇතුළත් කර ලියාපදිංචි කිරීමෙන් අනතුරුව එම මෝටර් රථ 2015 සිට 2022 වසර දක්වා කාලය තුළදී මෙරටට ආනයනය කර ඇති බව ත් අල්ලස් කොමිසමේ රහසිගත බුද්ධි ඒකකය සිදු කළ විමර්ශනවලදී මේ බව හෙළි කරගෙන ඇති බව ත් එම නිලධාරීන් අධිකරණයට දැන්වීය.
එසේ ව්‍යාජ තොරතුරු ඇතුළත් කර ලියාපදිංචි කිරීමෙන් අනතුරුව මෙරට විවිධ පළාත්වල පුද්ගලයන් සතුව තිබෙන එම මෝටර් රථ අත්අඩංගුවට ගැනීම සඳහා විමර්ශන සිදුකර ඇති බව ද විමර්ශන නිලධාරීන් අධිකරණය හමුවේ පැවැසීය.
විමර්ශන නිලධාරීන් අධිකරණයට දැක්වූ කරුණු සලකා බැලූ ප්‍රධාන මහෙස්ත්‍රාත්වරයා අත්අඩංගුවට ගෙන නොමැති සෙසු වාහන වහාම අත්අඩංගුවට ගැනීමට අවශ්‍ය පියවර ගන්නා ලෙස අල්ලස් හෝ දූෂණ විමර්ශන කොමිසන් සභාවේ නිලධාරීන්ට නියෝග කළේ ය.
- [mawbima]
