කුරුණෑගල තෝරයාය ප්‍රදේශයේදී සිදු වූ අනතුරෙන් සිවු දෙනෙකු ජීවතක්ෂයට පත්ව තිබේ.
මෙම අනතුරට හේතුව බස් රථය පැයට කිලෝ මීටර් 90කට අධික වේගයකින් ධාවනය වීම බව අනාවරණය වී තිබේ.
පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී බුද්ධික මනතුංග මහතා පැවසුවේ අදාළ බස් රථය කදුරුවෙල සිට තෝරයායට පැමිණ ඇත්තේ පැය 02කටත් අඩු කාලසීමාවකදී බවයි.
කුරුණෑගල තෝරයාය ප්‍රදේශයේ නවතා තිබූ පෞද්ගලික බස් රථයක තවත් පෞද්ගලික බස් රථයක් ගැටී අනතුරක් සිදු වූයේ ඊයේ පෙරවරුවේදීය. මෙම සිද්ධියෙන් අනතුර සිදු කළ බස් රථයේ කොන්දොස්තරවරයා ඇතුළු සිවු දෙනෙකු ජිවිතක්ෂයට පත්ව 28 දෙනෙකු තුවාල ලබා තිබේ. අනතුර සිදු කළ බස් රථයේ රියදුරු තුවාල ලැබූ අතර ඔහු ලබන 20 වනදා දක්වා රක්ෂිත බන්ධනාගාර ගත කෙරිණ.
අනතුරින් තුවාල ලැබුවන්ගෙන් බරපතල තුවාල ලැබූ 05 දෙනෙකු තවමත් කුරුණෑගල රෝහලේ දැඩිසත්කාර ඒකකයේ ප්‍රතිකාර ලබන අතර මගීන් චෝදනා කළේ බස් රථ දෙක තරඟයට අධික වේගයෙන් ධාවනය කිරීම හේතුව නිසා අනතුර සිදුවූ බවයි.
