‘සිරිලිය සවිය’ අරමුදල් වංචාවක් සම්බන්ධයෙන් අල්ලස් කොමිසම විසින් අත්අඩංගුවට ගෙන අධිකරණයට ඉදිරිපත් කළ හිටපු ජනාධිපති ආර්යා ශිරන්ති රාජපක්ෂ මහත්මිය වෙනුවෙන් පෙනී සිටි ජනාධිපති නීතිඥ අනිල් ද සිල්වා මහතා අද (07) කොළඹ ප්‍රධාන මහේස්ත්‍රාත් අධිකරණයේදී විශේෂ කරුණු රැසක් අනාවරණය කළේය.
සැකකාරිය වෙනුවෙන් ඇප ඉල්ලමින් කරුණු දැක්වූ ජනාධිපති නීතිඥවරයා සඳහන් කළේ, ‘සිරිලිය සවිය’ යනු 2006 වසරේ සිට ක්‍රියාත්මක වූ නිල වශයෙන් අනුමත සුබසාධන සංවිධානයක් බවයි. රිජ්වේ ආර්යා ළමා රෝහල සඳහා CT ස්කෑන් යන්ත්‍රයක් මිලදී ගැනීමට රුපියල් මිලියන 160ක් අවශ්‍ය වූ නමුත්, 2014 වන විට එකතු වී තිබුණේ රුපියල් මිලියන 42ක් පමණක් බවත්, එම මුදල ප්‍රමාණවත් නොවීම හේතුවෙන් යන්ත්‍රය මිලදී ගැනීමට නොහැකි වූ බවත් ඔහු පෙන්වා දුන්නේය. 2014 වසරේ රජය වෙනස් වීමත් සමඟ ලැබුණු පැමිණිල්ලක් මත අදාළ බැංකු ගිණුම සීල් තබා ඇති බැවින්, අදාළ මුදල් තවමත් සුදුවැල්ල ශාඛාවේ ගිණුම තුළම පවතින බවත්, එහි කිසිදු දූෂණයක් හෝ වංචාවක් සිදුවී නොමැති බවත් නීතිඥවරයා අධිකරණයට දන්වා සිටියේය.
