ඔයාගේ මොලේ හොරෙන් කන “ස්ක්‍රෝල් කිරීමේ රකුසෝ” !

ඔයාගේ මොලේ හොරෙන් කන ( FaceBook , YouTube , Tiktok ) “ස්ක්‍රෝල් කිරීමේ රකුසො”!

ඔයාටත් වෙලාවකට හිතෙනවද ඔයාගේ මොලේ හරියට වැඩ කරන්නේ නෑ, ඉස්සර වගේ නෙවෙයි කියලා? නිකන් හරියට පොඩි ලමයෙක් වගේ, එක එක වීඩියෝ පස්සේ දුවනවා, එකක් ඉවර වෙන්නත් කලින් තව එකක් බලනවා… බලලා ඉවර වෙලා කල්පනා කරලා බැලුවම, එකක්වත් ඔළුවේ නැහැ!

අපි හැමෝම වගේ දැන් ෆෝන් එක අතට ගන්නේ හරියට ඒක අපේ ඇඟේ කොටසක් වගේනේ. ඉතින්, ඔය සමාජ මාධ්‍ය ඇප් හදලා තියෙන්නේ හරියට මත්ද්‍රව්‍ය වගේ. පොඩි පොඩි වීඩියෝ වලින් ඔයාගේ මොළේට පොඩි සතුටක් දෙනවා. හරියට චොකලට් කෑල්ලක් කෑවා වගේ. එකක් කෑවම තව එකක් කන්න හිතෙනවා වගේ, එක වීඩියෝ එකක් බැලුවම තව එකක් බලන්න හිතෙනවා. මේකෙන් වෙන්නේ, ඔයාගේ මොලේ “ඉක්මන් සතුටට” කෑදර වෙන එක. එතකොට පොතක් කියවන්න, පාඩම් කරන්න වගේ ටිකක් මහන්සි වෙලා කරන්න ඕන දේවල් එපා වෙනවා. හරියට බත් කන්න ඕන වෙලාවට චොකලට් කාලා බඩ පිරෙව්වා වගේ තමයි!

මොකක්ද මේ “බ්‍රේන් රොට්” සීන් එක? (Brain Rot = මොලේ කුණු වෙනවා වගේ තේරුමක්)

Reels,SHorts කොට වීඩියෝ වල “අල්ලගන්නා” ගතිය!

දැන් බලන්නකෝ, හැම තැනම තියෙන්නේ පොඩි පොඩි වීඩියෝ නේද? ටික්ටොක්, ඉන්ස්ටා රීල්ස්, යූටියුබ් ෂෝට්ස්… මේ ඔක්කොම හරියට පොඩි පොඩි මාළු දැල් වගේ. ඔයාව අල්ලගෙන ඉන්නවා. ඔයා හිතන්නේ නිකන් වෙලාව යන්න බලනවා කියලා. ඒත් වෙන්නේ ඔයාගේ මොලේ අලුත් දේවල් වලට පිස්සු වැටිලා දුවන එක.

ඉස්සර මිනිස්සු පැය ගණන් පොත් කියෙව්වා, ෆිල්ම් බැලුවා. දැන්? ෆෝන් එකක් අතට ගත්තොත් එක වීඩියෝ එකක්ත තත්පර ගානකින් එපා වෙනවා! හරියට ඉස්සර කාලේ රස කෑම හදලා හෙමීට රස වින්දා වගේ නෙමෙයි, දැන් ක්ෂණික නූඩ්ල්ස් කාලා දානවා වගේ.

“ඉගෙන ගන්නවා” කියලා හිත රවට්ටගන්න එපා!

ගොඩක් අය හිතනවා එයාලා පොඩි පොඩි “අධ්‍යාපනික” වීඩියෝ බැලුවම දැනුම ලැබෙනවා කියලා. ඒත් ඒක හරියට කඩේකින් කෑම කාලා “ගෙදර උයන්න ඉගෙන ගත්තා” කියනවා වගේ වැඩක්! ඇත්තටම ඉගෙන ගන්න නම්, ටිකක් මහන්සි වෙන්න වෙනවා. එකම දේ ආයෙ ආයෙ කරන්න වෙනවා. හොඳට හිතලා බලන්න ඕන. සමාජ මාධ්‍ය වලින් ඒකට උදව්වක් ලැබෙන්නේ නැහැ. වෙන්නේ ඔයාගේ මොලේ කම්මැලි වෙන එක විතරයි.

මේකෙන් ගැලවෙන්න බැරිද? ඇත්තටම අපි අසරණද?

ඔයා නිකන් රූකඩයක් නෙවෙයි!
ගොඩක් අය සමාජ මාධ්‍ය වලට බනිනවා එයාලට හිත එක තැන තියාගන්න බැරි එක ගැන. එයාලා කියන්නේ, “මේ පොඩි වීඩියෝ මාව පිස්සෙක් කරනවා!” කියලා. ඒත් හිතලා බලන්න, ෆෝන් එක ඔයාව බලෙන් අල්ලගෙන ස්ක්‍රෝල් කරවනවද? නැහැ නේද? ෆෝන් එක අතට ගන්නේ ඔයා. ස්ක්‍රෝල් කරන්නෙත් ඔයාම තමයි.

“මට ෆෝන් එක බලන එක නවත්තන්න බෑ” කියන එක නිකන් බොරුවක්.

ඇත්ත ප්‍රශ්නේ: “මට බෑ” කියලා හිතන එක!
ඇත්තම ප්‍රශ්නේ මේ පොඩි වීඩියෝ නෙවෙයි. ප්‍රශ්නේ තියෙන්නේ ඔයාගේ හිතේ. ඔයා හිතනවා නම් ඔයාට මේකෙන් ගැලවෙන්න බෑ කියලා, එතකොට ඔයා හැමදාම අසරණ වෙලා ඉන්නවා.

හිතන්නකෝ, ඔයා දවසකට කී පාරක් තීරණ ගන්නවද? උදේ නැගිටින්න ඕන වෙලාව, කන්න ඕන මොනවද, අඳින්න ඕන මොනවද… ඔය වගේ දේවල් වල ඉඳන් ලොකු ලොකු තීරණ වෙනකන් හැමදේම ඔයාගේ අතේ. ඉතින්, “මට ෆෝන් එක බලන එක නවත්තන්න බෑ” කියන එකත් ඔයා ගන්න තීරණයක්. ඒ තීරණේ වෙනස් කරන්න බැරි ඇයි?

නිදහසේ පාර හොයාගන්න…

උදේ පාන්දර “ෆෝන් පූජාව” නවත්තන්න!

උදේ නැගිට්ට ගමන් ෆෝන් එක බලන එක හරියට උදේම කුණු කෑම කාලා දවස පටන් ගන්නවා වගේ. එතකොට මුළු දවසම අවුල් වෙනවා.

ඒ වෙනුවට මෙහෙම කරන්න:

නැගිට්ට ගමන් ෆෝන් එක අතට ගන්න එපා.
ටිකක් වෙලා ඇඳේ ඉඳන් හිතන්න අද දවස ගැන. මොනවද කරන්න ඕන, කොහොමද ඒවා කරන්නේ කියලා.
ඊට පස්සේ නැගිටලා මූණ හෝදලා, වතුර ටිකක් බීලා, පුළුවන් නම් පොඩි ව්‍යායාමයක් කරන්න.
ඊට පස්සේ හොඳ උදේ කෑමක් කාලා, තේ එකක් එහෙම බීලා, ෆෝන් එක පැත්තකට දාලා ඔයාගේ වැඩ පටන් ගන්න.

වෙලාව කන ඇප් වලට “බුදු සරණයි” කියන්න!

ඔයාට ඕන නැත්තම් පැය ගණන් නිකරුනේ ස්ක්‍රෝල් කරන්න, ඒක කරන්න අමාරු වෙන්න වැඩ ටිකක් කරන්න. හරියට කෑම අඩු කරගන්න ඕන කෙනෙක් ගෙදර රසකැවිලි තියාගන්නේ නැතුව ඉන්නවා වගේ.

ටික්ටොක්, ඉන්ස්ටග්‍රෑම් වගේ ඇප් ඔයාගේ වෙලාව කනවා නම් අයින් කරලා දාන්න. බය වෙන්න එපා! ඔයාට මොකුත් වෙන්නේ නැහැ!
වැදගත් නැති නෝටිෆිකේෂන් ඕෆ් කරන්න. හරියට ගෙදර දොරවල් වහලා හොරු එන එක නවත්තනවා වගේ.
සමාජ මාධ්‍ය බලන්න දවසට වෙලාවක් වෙන් කරන්න. එතකොට ඔයාට අනිත් වැඩ ටික කරගන්න වෙලාව තියෙනවා.

දැනෙන” දේවල් කරන්න!

සමාජ මාධ්‍ය කියන්නේ හරියට ටීවී එකක් බලනවා වගේ වැඩක්. ඔයා නිකන් බලාගෙන ඉන්නවා විතරයි. ඒ වෙනුවට ඔයාව ඇත්තටම ජීවත් වෙනවා කියලා “දැනෙන” දේවල් කරන්න.

ක්‍රීඩා කරන්න, ජිම් යන්න. ඇඟ මහන්සි වෙනකොට හිතත් අලුත් වෙනවා.
මුකුත් අහන්නේ නැතුව ඇවිදින්න යන්න, බයිසිකලයක් අරගෙන පදින්න යන්න. කුරුල්ලන්ගේ සද්දේ, ගස් වල සද්දේ අහගෙන ඇවිදින එක හරිම ලස්සන අත්දැකීමක්.
යාලුවෝ එක්ක කතා කරන්න, සෙල්ලම් කරන්න. ෆෝන් එක පැත්තකට දාලා ඇත්තටම මිනිස්සු එක්ක ඉන්න එක කොච්චර වටිනවද!

ඔයාගේ මොලේ ආපහු ඔයාගේ කරගන්න!

අවසාන වශයෙන් කියන්න තියෙන්නේ, ඔයාගේ මොලේ කොහේවත් ගිහින් නැහැ. ඒක නිකන් අර එක එක දේවල් වලින් වැහිලා තියෙන්නේ. ඔයා ඒ දේවල් අයින් කරලා, හොඳ දේවල් වලින් මොලේ පුරවන්න ඕන. හරියට ගෙදරක කුණු අයින් කරලා, ලස්සන මල් පැල හිටවනවා වගේ.

ඔයා තාක්ෂණයේ සෙල්ලම් බඩුවක් නෙවෙයි. ඔයාට පුළුවන් ඔයාගේ ජීවිතේ වෙනස් කරන්න. තීරණය ඔයාගේ අතේ!

Dr. priya