අල්ලස් හෝ දුෂණ චෝදනා විමර්ශන කොමිෂන් සභාව විසින් සැකපිට රක්ෂිත බන්දනාගාරගත කර සිටින හිටපු රාජ්‍ය අමාත්‍ය ශෂීන්ද්‍ර රාජපක්ෂ ලබන 19 දක්වා තවදුරටත් රක්ෂිත බන්ධනාගාරගත කරන ලෙස කොළඹ මහෙස්ත්‍රාත් අධිකරණය අද (12) නියම කර තිබෙනවා.
මහවැලි ඉඩමක ඉදිකර තිබූ සිය දේශපාලන කාර්යාලය අරගලකරුවන් විසින් ගිනිතබා විනාශ කිරීම හේතුවෙන් නීතියට පටහැනි ලෙස රුපියල් 8,850,000ක මුදලක් වන්දි වශයෙන් ලබාගැනීම තුළින් දූෂණ විරෝධී පනත යටතේ “දූෂණය” නමැති වරද සිදුකළ බවට චෝදනා කරමින් හිටපු රාජ්‍ය අමාත්‍ය ශෂීන්ද්‍ර රාජපක්ෂ මහතා අල්ලස් කොමිසම මගින් අත්අඩංගුවට ගැනීමෙන් අනතුරු මෙලෙස රක්ෂිත බන්ධනාගාරගත කර තිබුණා.
කෙසේ වෙතත් ශෂීන්ද්‍ර රාජපක්ෂ වෙනුවෙන් පෙනී සිටි නීතිඥ අනූජ ප්‍රේමරත්න අධිකරණය හමුවේ කරුණු දක්වමින් පවසා ඇත්තේ ඔහු නින්දේ දී හුස්ම හිරවීමේ රෝගයකට ගොදුරු වි සිටින බවයි.
ඔහුගේ සෞඛ්‍ය තත්ත්වය මේ වන විට සෑහෙන්න පිරිහීමට ලක්වී තිබෙන බවත් මොහු ස්ලීප් ඇප්නියා (sleep apnea) යන රෝගයෙන් දරුණු ලෙස පීඩා විඳින බවත්ය
මෙම තත්ත්වය පාලනය කිරීමට නම් “ස්ලීප් ඇප්නියා” යන මැෂින් එකක් භාවිත කළ යුතු බවත් මේ වෙනවිටත් මාසයක පමණ කාලයක් මේ සැකකරු අදාළ යන්ත්‍රය නොමැතිව බන්ධනාගාරය තුළ සිටිබවත් නීතිඥවරයා පවසයි.
මෙහි ප්‍රතිඵලයක් ලෙස ඔහුගේ රුධිරය පීඩනය වැඩිවීමත්, රුධිරයේ පීඩනය වැඩිවීම නිසා ඔහුගේ ජීවිතය පවා අවදානම්කාරී තත්ත්වයකට පත්ව සිටින බවත් සඳහන් කළ ජනාධිපති නීතිඥ අනූජ ප්‍රේමරත්න මෙම සැකකරුට ඇප නියම කරන ලෙස ඉල්ලා සිටියා.
ඊට ප්‍රතිචාර දැක්වූ අල්ලස් කොමිසම වෙනුවෙන් පෙනී සිටි එහි සහකාර අධ්‍යක්ෂ ජනරාල් සුලෝචනා හෙට්ටිආරච්චි සැකකරු ඇප මත මුදා හරින ලෙස කළ ඉල්ලීම සම්බන්ධයෙන් විරෝධය පළ කර තිබෙනවා.
“ස්වාමීනී… සැකකරු වෙනුවෙන් ඉදිරිපත් කරන කරුණු පිළිගන්න බැහැ. මොහු මේ වන විට මැෂින් එක නැතුව මාසයක් පමණ බන්ධනාගාරේ සිටි බව සඳහන් වුණා. ඔහුට මේ කියන ආකාරයට දරුණු රෝගී තත්ත්වයක් තියෙනවා නම් ඔහු මේ වන විට මියගොස් තිබිය යුතුයි.” යනුවෙන් සඳහන් කළ සහකාර අධ්‍යක්ෂ ජනරාල්වරිය සැකකරු වෙනුවෙන් ඉදිරිපත් කළ මෙම කරුණු ඇපදීමට තරම් සුවිශේෂි කරුණු නොවන බවත් ඒ අනුව ඇප ඉල්ලීම ප්‍රතික්ෂේප කර සැකකරු රක්ෂිත බන්ධනාගාර ගත කරන ලෙසත් ඇය අධිකරණයෙන් ඉල්ලා සිටියා ය.
- ඇතැම් කොටස් BBC වෙබ් අඩවිය උපුටා ගන්නා ලදී
