ගම්පොළ – දොළුව මාර්ගයේ සිදුවූ දැඩි අනතුරක් හේතුවෙන් සිල් සමාදන් වීමට ගමන් වූ කාන්තාවන් තිදෙනෙකු ජීවිතක්ෂයට පත්ව ඇති බව පොලීසිය පවසයි.
මෙම අනතුර සිදුවී ඇත්තේ මෝටර් රථයක් හා ලොරි රථයක් එකිනෙක ගැටීමෙන් පසුවයි.
කාන්තාවන් සිව්දෙනා අතරින් තිදෙනෙකු එම ස්ථානයේදීම ජීවිතක්ෂයට පත්වූ බව පොලීසිය පැවසීය.
තුවාල ලැබූ අනෙක් කාන්තාව මහනුවර ජාතික රෝහලට ඇතුළත් කෙරුණි.
අනතුරින් මියගියේ ගම්පොළ දොළුව ප්‍රදේශයේ පදිංචිව සිටි 70 හැවිරිදි රාමනායක මුදියන්සේලාගේ පොඩි මැණිකේ, 67 හැවිරිදි මාලිනි විජේසූරිය සහ ගම්පොළ ගුරුකැලේ පදිංචිව සිටි පල්ලේගෙදර අනුලාවතී යන කාන්තාවන් තිදෙනාය.
අනතුර සිදුකළ මෝටර් රථය පදවා ඇත්තේ 36 හැවිරිදි කාන්තාවකි.
ඇය පුහුණුවන රිය බලපත්‍රයක් හිමි තැනැත්තියක් බව පොලීසිය සඳහන් කළේය.
පොලීසිය දක්වන්නේ අනතුරට ලක්වූ පුද්ගලයන් සියල්ලන්ම මාර්ගයෙන් ගමන් කරමින් සිටි බවය.
මෙලෙස ජීවිතක්ෂයට පත් වූ කාන්තාවන් සිල් සමාදන් වීමට යමින් සිටි බවයි ප්‍රදේශවාසීන් තහවුරු කරන්නේ.
මෝටර් රථය පැදවූ කාන්තාවගේ අපරික්ෂාකාරී රිය ධාවනය අනතුරට හේතුව බවට පොලීසිය සැක පළ කරයි.
අනතුර පිළිබඳ වැඩිදුර පරීක්ෂණ මේ වනවිටත් ගම්පොළ පොලීසිය මඟින් සිදු කරමින් පවතී.
මෙම සංවේදී අනතුර, වාහන රියදුරන්ට ආරක්ෂාව පිළිබඳව නැවත නැවත සැලකිල්ලක් යොමු කළ යුතු අවස්ථාවක් වශයෙන් සැළකිය හැක.
