ලෝක සෞඛ්‍ය සංවිධානය (WHO) ඉන්දියාවේ හඳුනාගත් විෂ සහිත කැස්ස සිරප් වර්ග තුනකට සම්බන්ධව සෞඛ්‍ය අනතුරු ඇඟවීමක් නිකුත් කර තිබෙනවා.
එම සංවිධානය බලධාරීන් ගෙන් ඉල්ලා සිටියේ, මෙම ඖෂධ ඔවුන්ගේ රටවල තිබේ නම්, වහාම සෞඛ්‍ය අධිකාරීයට දැනුම් දිය යුතු බවයි.
අදාළ සිරප් වර්ග වනුයේ — Sresan Pharmaceuticals සමාගමේ (Coldrif), Rednex Pharmaceuticals සමාගමේ (Respifresh TR) Shape Pharma සමාගමේ (ReLife) යන කැස්ස සිරප් වර්ග තුනයි.
මෙම නිෂ්පාදනවල දී ඩයිතිලීන් ග්ලයිකෝල් (DEG) නමින් හැඳින්වෙන විෂ ද්‍රව්‍යය ආරක්ෂිත සීමාවට වඩා 500 ගුණයකටත් වැඩි ලෙස සොයාගන්නා ලදි. WHO අනුව, මෙය ශරීරයේ විෂබීජ තත්ත්වයන් ඇතිකර ජීවිතයට තර්ජනයක් විය හැකි අති දැඩි අවදානමකි.
ඉන්දියාවේ මධ්‍යම ඖෂධ ප්‍රමිති පාලන ආයතනය (CDSCO) පවසන්නේ, මෙම සිරප් භාවිතය මධ්‍ය ප්‍රදේශ් පළාතේ චින්ද්වාරා දිස්ත්‍රික්කයේදී වයස අවුරුදු 5ට අඩු ළමුන් 22ක් වෙත සිදු කර ඇති අතර, ඔවුන්ගෙන් බොහෝ දෙනෙක් මියගොස් ඇති බවයි.
පරීක්ෂණවලදී එම සිරප්වල DEG ප්‍රමාණය 48.6% ලෙස අධික මට්ටමක පවතින බවත් සොයාගන තිබෙනවා.
එසේම රාජස්ථාන පළාතේද මේ සිරප් භාවිතයෙන් ළමුන් 3ක් මියගොස් ඇති බව වාර්තා වී තිබෙනවා. මේ හේතුවෙන් ඉන්දියානු රජය එම නිෂ්පාදනවල නිෂ්පාදනය, බෙදාහැරීම සහ විකුණීම වහාම නවත්වන ලෙස නියෝග කරන ලෙසයි.
CDSCO තවදුරටත් පවසා සිටියේ, මෙම දූෂිත ඖෂධ ඉන්දියාවෙන් විදේශ ගත වී නැති බවත්, නීතිවිරෝධී අපනයන කටයුතු ගැන කිසිදු සාක්ෂියක් නොමැති බවත්ය. එක්සත් ජනපදයේ FDAද එම සිරප් තම රටට ඇතුළත් වී නැති බව 11 වන දා තහවුරු කර තිබෙනවා.
WHO සඳහන් කරන්නේ, මෙම සිදුවීම් ඉන්දියාවේ ඖෂධ පාලන ක්‍රමවේදය තුළ පවතින දුර්වලතා ඉස්මතු කරන බවත්, DEG හා EG පරීක්ෂණ ක්‍රියා පටිපාටි වැඩිදියුණු කිරීමේ අවශ්‍යතාවයක් ඇති බවත්ය.
එමෙන්ම, විදේශ රටවලට අපනයනය වන ඖෂධවල විෂ පරීක්ෂණ වැඩිදියුණු කිරීමට 2023 සිට ක්‍රියාත්මක ඉන්දියානු රජයේ වැඩපිළිවෙළට අමතර උපදෙස්ද ලබාදෙන බව WHO ප්‍රකාශ කරයි.
