ශ්රී ලංකාවේ සංගීත නිර්මාණකරුවන්ගේ සහ සංගීත ප්රකාශකයන්ගේ සංගමය හෙවත් ‘ඇක්පෝ එස්එල්’ (IPRO SL) ආයතනය ‘කර්තෘභාග’ (Royalties) නමින් අසාධාරණ ලෙස මුදල් අය කිරීමට එරෙහිව සියලුම නීතිමය ක්රියාමාර්ග ගන්නා බව සමස්ත ලංකා ප්රසංග සංවිධායකවරුන්ගේ සහ සම්බන්ධීකාරවරුන්ගේ සංගමයේ සභාපති සම්පත් කුමාරසිංහ මහතා පවසයි.
‘ඇක්පෝ එස්එල්’ ආයතනය සංගීත ප්රසංග වෙනුවෙන් විශාල මුදලක් අය කිරීම හේතුවෙන් පැනනැඟී ඇති ගැටලුව පිළිබඳව දැනුවත් කිරීම සඳහා බොරැල්ලේදී අද (12) පැවැති විශේෂ මාධ්ය හමුවකදී ඒ මහතා මෙම අදහස් පළ කළේය.
මාධ්ය හමුවේදී අනාවරණය වූ ප්රධාන කරුණු:
* වෙළෙඳ අමාත්යාංශය විසින් පසුගිය ජූනි මස 6 වැනි දින මෙම ආයතනයට බලය පවරා නිකුත් කර ඇති ගැසට් නිවේදනය වහාම අවලංගු කරන ලෙසත්, මෙම තත්ත්වය හමුවේ ඉදිරියේදී සාමාන්ය ජනතාවට බස් රථයකදී හෝ ගීතයක් රසවිඳීමේ අවස්ථාව අහිමි විය හැකි බැවින් රජය සහ ජනාධිපතිවරයා මීට වහාම මැදිහත් විය යුතු බවත් සම්පත් කුමාරසිංහ මහතා අවධාරණය කළේය.
* දැනටමත් පළාත් පාලන ආයතන ගාස්තු, පොලිස් ගාස්තු සහ අනෙකුත් බදු ඉහළ යෑම නිසා දැඩි අර්බුදයකට මුහුණ දී සිටින පසුබිමක, ‘ඇක්පෝ එස්එල්’ ආයතනය ලක්ෂ ගණනින් කර්තෘභාග අය කරන බව හෙතෙම පෙන්වා දුන්නේය.
* බුද්ධිමය දේපළ කාර්යාලයේ අධ්යක්ෂ ජනරාල්වරියගේ මැදිහත් වීමෙන් නිකුත් කර ඇති ගැසට් නිවේදනයට අනුව, ගීත 5ක් ගායනා කරන කලාකරුවකු වෙනුවෙන් රුපියල් 50,000කට අධික මුදලක් කර්තෘභාග ලෙස ගෙවීමට සිදුවන බවද ඔහු සඳහන් කළේය.
* එසේම, 2020 වසරේ සිට මෙම ආයතනය විසින් කර්තෘභාග නමින් අය කළ මුදල්වලට සිදුවූයේ කුමක්ද යන්න බලධාරීන් විසින් සොයා බැලිය යුතු බවද හෙතෙම වැඩිදුරටත් කියා සිටියේය.
