ශ්‍රී ලංකා දුම්රිය දෙපාර්තමේන්තුවේ දුම්රිය එන්ජින් රියදුරු, දුම්රිය නියාමක, දුම්රිය ස්ථානාධිපති සහ දුම්රිය අධීක්ෂණ කළමනාකරු යන තනතුරු සඳහා කාන්තා නිලධාරිනියන් බඳවා ගැනීමට ප්‍රතිපත්තිමය අනුමැතිය ලැබී තිබෙන බව රජය නිවේදනය කර ඇත.
කැබිනට් තීරණ දැනුම්දීමේ මාධ්‍ය සාකච්ඡාවට එක්වෙමින් අමාත්‍ය නලින්ද ජයතිස්ස මහතා පවසා සිටියේය, වසර 165 ක ඉතිහාසයක් ඇති ශ්‍රී ලංකා දුම්රිය සේවය තුළ මෙම තනතුරු සඳහා මෙතෙක් පිරිමි නිලධාරීන් පමණක් බඳවා ගෙන ඇති බවයි.
2012 සහ 2015 වසරවල පමණක් දුම්රිය අධීක්ෂණ කළමනාකරු තනතුරට කාන්තා නිලධාරින් බඳවාගෙන තිබුණද, අනෙකුත් තනතුරු සඳහා මෙය පළමු වරට සිදුවෙයි.
රජයේ නව ආර්ථික හා රාජ්‍ය සේවා ප්‍රතිපත්ති අනුව, මෙතෙක් කාන්තාවන් බඳවා නොගත් රාජ්‍ය තනතුරු වෙත කාන්තා අවකාශ විවෘත කිරීම උදෙසා මෙම තීරණය ගත් බවද අමාත්‍යවරයා පැවැසීය.
ඒ අනුව, කැබිනට් මණ්ඩලය විසින් අනුමැතිය ලබාදී ඇති අතර, ඉදිරියේදී කාන්තා එන්ජින් රියදුරියන්, නියාමකයින් හා ස්ථානාධිපතිනියන් දුම්රිය සේවයේ දැකිය හැකි වනු ඇත.
