මහරගම – පිළියන්දල අයට සතුටු පුවතක් !

මහරගම පිළියන්දල මාර්ගයේ කිලෝමීටර් 2+000 සිට කිලෝමීටර් 3+700 දක්වා මාර්ග කොටස පුනරුත්ථාපනය කිරීම සහ දියුණු කිරීමට කැබිනට් අනුමැතිය හිමිව තිබේ.

කොළඹ දිස්ත්‍රික්කයේ කිලෝමීටර 46 ක දිග ප්‍රමාණයකින් යුත් ජාතික මාර්ග වැඩි දියුණු කිරීම සඳහා ඇමෙරිකානු ඩොලර් මිලියන 50ක අරමුදල් සපයා ගැනීම පිණිස අන්තර් ජාතික සංවර්ධනය සඳහා වන ඔපෙක් අරමුදල සමඟ ණය ගිවිසුමකට එළඹ ඇත.

එම ණය මුදල යටතේ වන අවසන් ව්‍යාපෘතිය වශයෙන් කිලෝමීටර 6.7 කින් යුත් මහරගම – පිළියන්දල මාර්ගය හඳුනාගනු ලැබ තිබේ.

එම මාර්ගයේ එක් කිලෝමීටරයක ප්‍රමාණයක් දැනටමත් වැඩි දියුණු කර ඇති අතර, ඉතිරි කිලෝමීටර 5.7 ක ප්‍රමාණය පැකේජ 03 ක් යටතේ වැඩි දියුණු කිරීමට තීරණය කර ඇත. ඒ අනුව, A සහ C කොටස්වල කිලෝමීටර 04 ක ප්‍රමාණයක වැඩිදියුණු කිරීමේ කටයුතු ණය මුදලේ ප්‍රතිපාදන යටතේ දැනටමත් ආරම්භ කර තිබේ. B කොටස වන ඉතිරි කිලෝමීටර 1.7 ක ප්‍රමාණය වැඩිදියුණු කිරීම සඳහා එකී ණය මුදලේ අරමුදල් ප්‍රමාණවත් නොවන බව හඳුනාගෙන ඇත. එබැවින්, මහරගම – පිළියන්දල මාර්ගයේ B කොටසේ කිලෝමීටර 1.7 ක ප්‍රමාණය ශ්‍රී ලංකා රජයේ අරමුදල් මඟින් අලුත්වැඩියා කිරීම පිණිස වැඩබලන ප්‍රවාහන, මහා මාර්ග සහ නාගරික සංවර්ධන අමාත්‍යතුමා ඉදිරිපත් කළ යෝජනාව අමාත්‍ය මණ්ඩලය විසින් අනුමත කරන ලදී.