නව අයවැය සමඟ වාහන ආනයනයේදී දැනට අදාළ වන 15%ක බදු වට්ටම ඉවත් කිරීමට රජය සූදානම් වන බව වාර්තා වේ.
එම වට්ටම ඉවත් වුවහොත් සියලුම වාහනවල මිල ගණන් වැඩිවිය හැකි බව ශ්‍රී ලංකා වාහන ආනයනකරුවන්ගේ සංගමයේ ප්‍රකාශක ප්‍රසාද් මානගේ මහතා සඳහන් කරයි.
ඔහු පැහැදිලි කරමින් සඳහන් කළේ, වර්තමාන ක්‍රමය අනුව වාහන ආනයනයේදී විදේශ වෙබ් අඩවිවල සඳහන් වාහන වටිනාකම මත බදු ගණනය කරන අතර, එම වටිනාකමෙන් 15%ක වට්ටමක් අඩු කර බදු ගෙවීම සිදු කරන බවයි.
ඒ අනුව බදු සඳහා අය කරනු ලබන්නේ වටිනාකමින් 85%ක් පමණි.
නමුත්, ආයතනික ආරංචි මාර්ග අනුව මෙම 15%ක වට්ටම ඉවත් කිරීමට සැලසුම් වන බවත්, එය ක්‍රියාත්මක වුවහොත් වාහන මිල ගණන් සැලකිය යුතු ලෙස ඉහළ යන බවත් මානගේ මහතා අවධාරණය කරයි.
ඔහු උදාහරණයක් ලෙස පැවසුවේ, “වාහනයක වටිනාකම රු. 100ක් නම්, දැනට බදු ගෙවන්නේ එහි 85% මතයි. නමුත් වට්ටම ඉවත් වුවහොත්, එම ගණනය 100% මත සිදු වන නිසා මිල ඉහළ යාම අත්‍යවශ්‍යයයි” යනුවෙනි.
මෙම බදු වෙනස ක්‍රියාත්මක වූ පසු, Alto, Wagon R, Buddy Van* වැනි කුඩා වාහනවල සිට විශාල වාහන දක්වා සියලුම වාහනවල මිල ඉහළ යාමක් සිදුවන බව ඔහු පෙන්වා දෙයි.
ඒ අනුව, වාහන ආනයනකරුවන්ගේ සංගමය රජයට ඉල්ලීමක් කර තිබෙන්නේ මෙම 15%ක බදු වට්ටම ඉවත් නොකර එය පවත්වාගෙන යාමටය.
මානගේ මහතා වැඩිදුරටත් පැහැදිලි කර සිටියේ, නවතම (brand new) වාහනවලට පවා මෙම වට්ටම අදාළ වන බවත්, 2023 වසරේදීද ඒ සඳහා බදු ගෙවූ බවත්ය. ඔහු අනුව, මෙම බදු වට්ටම 2015 වසරේ සිට අඛණ්ඩව ක්‍රියාත්මක වන අතර, එය ඉවත් කිරීම ආනයනකරුවන්ට හා පාරිභෝගිකයින්ට බරපතල බලපෑමක් ඇති කරන බවයි.
ඒ හේතුවෙන්, දැනටමත් ඉහළ මට්ටමක පවතින වාහන මිල තවත් ඉහළ නොයන ලෙස රජය මෙම සහනය පවත්වාගෙන යන්නැයි සංගමය අවධාරණය කරයි.
