ප්රමිතියෙන් තොර සහ ප්රමාණවත් නොවන ගල්අඟුරු තොගයක් මිලදී ගැනීම හේතුවෙන් ඉදිරියේදී විදුලි කප්පාදුවක් සිදුවීමේ අවදානමක් පවතින බව යටිතල පහසුකම් සංවර්ධනය සහ උපායමාර්ගික සංවර්ධනය පිළිබඳ අංශගත අධීක්ෂණ කාරක සභාවේ සභාපති, විපක්ෂ මන්ත්රී එස්.එම්. මරික්කාර් මහතා ඊයේ (18) මාධ්ය වෙත ප්රකාශ කළේය.
නොරොච්චෝල ලක්විජය බලාගාරය පූර්ණ ධාරිතාවයෙන් ක්රියාත්මක කිරීම සඳහා තවත් ගල්අඟුරු මෙට්රික් ටොන් 341ක් (වාර්තාවට අනුව) අමතරව අවශ්ය බවත්, එම තොගය ලබන අප්රේල් මාසයට පෙර මෙරටට ගෙන්වා ගැනීමට නොහැකි වුවහොත් විදුලි හිඟයක් මතු වී විදුලි කප්පාදුවකට මඟ පෑදිය හැකි බවත් ඔහු පෙන්වා දුන්නේය. මෙම අතිරේක ගල්අඟුරු මිලදී ගැනීමට රුපියල් බිලියන 10ක අමතර වැයක් දැරීමට සිදුවන බවත්, මෙය රජයේ මුදල් නාස්ති කිරීමක් බවත් මන්ත්රීවරයා වැඩිදුරටත් කියා සිටියේය.
මෙම ගනුදෙනුව සඳහා ටෙන්ඩර් පටිපාටිය ද අත්තනෝමතික ලෙස වෙනස් කර ඇති බවට මන්ත්රීවරයා චෝදනා කළේය. ටෙන්ඩර් ඉදිරිපත් කිරීමේ කාලසීමාව දින 42 සිට දින 21 දක්වා අඩු කර ඇති බවත්, මීට පෙර අවම වශයෙන් ගල්අඟුරු මෙට්රික් ටොන් මිලියනයක් සැපයූ අත්දැකීම් සහිත සමාගම්වලට පමණක් තිබූ සුදුසුකම් දැන් මෙට්රික් ටොන් ලක්ෂ පහ දක්වා අඩු කර ඇති බවත් ඔහු අනාවරණය කළේය. මෙම වංචාව සඳහා ජනාධිපති අනුර කුමාර දිසානායක මහතා වගකිව යුතු නැති බවත්, ඔහු වටා සිටින පිරිසක් මෙයට වගකිව යුතු බවත් මරික්කාර් මහතා පැවසීය.
කෙසේ වෙතත්, විදුලිබල හා බලශක්ති අමාත්යාංශයේ ලේකම් උදයංග හේමපාල මහතා මෙම චෝදනා ප්රතික්ෂේප කර ඇත. මෙය වංචාවක් නොවන බවත්, මේ සතියේ ලංකා විදුලිබල මණ්ඩලය තුළ අභ්යන්තර විගණනයක් සිදු කිරීමට නියමිත බවත් ඔහු ප්රකාශ කළේය. පවතින ගල්අඟුරු තොග අවසන් වීමට පෙර නව තොග සම්බන්ධයෙන් විමර්ශනය කිරීම සාමාන්ය ක්රියාපටිපාටිය බව ද ලේකම්වරයා වැඩිදුරටත් සඳහන් කළේය.
