හිටපු ජනාධිපති රනිල් වික්රමසිංහ මහතාගේ ධුර කාලය අවසන් වීමෙන් පසු ජනාධිපති ලේකම් කාර්යාලය වෙත භාර දුන් වාහනවල ලියාපදිංචි අංක සහ එම වාහන පසුව වෙන් කරන ලද අමාත්යාංශ හා දෙපාර්තමේන්තුවල විස්තර වහාම නිකුත් කරන ලෙස තොරතුරු දැනගැනීමේ අයිතිවාසිකම් පිළිබඳ (RTI) කොමිෂන් සභාව ජනාධිපති ලේකම් කාර්යාලයට නියෝග කර තිබේ.
තොරතුරු කොමිසම විසින් ජනාධිපති ලේකම් ආචාර්ය නන්දික සනත් කුමාරනායක මහතාට සහ ජනාධිපති ලේකම් කාර්යාලයේ තොරතුරු නිලධාරියාට දැනුම් දී ඇත්තේ 2026 ජනවාරි 31 වැනිදා හෝ ඊට පෙර අදාළ තොරතුරු අභියාචකයා වෙත ලබා දෙන ලෙසයි. මෙම නියෝගය පැහැර හරින්නේ නම්, තොරතුරු දැනගැනීමේ අයිතිවාසිකම් පිළිබඳ පනතේ 39 වැනි වගන්තිය යටතේ මහේස්ත්රාත් අධිකරණය හමුවේ නීතිමය ක්රියාමාර්ග ගැනීමට සිදුවන බවට ද කොමිසම අනතුරු ඇඟවීමක් කර ඇත.
නිදහස් මාධ්යවේදී රාහුල් සමන්ත හෙට්ටිආරච්චි මහතා විසින් කරන ලද ඉල්ලීමකට අනුව, 2024 සැප්තැම්බර් 23 වැනිදායින් පසු ජනාධිපති ලේකම් කාර්යාලයට භාර දුන් වාහන 68ක විස්තර මෙලෙස ඉල්ලා තිබුණි. මීට පෙර ජනාධිපති ලේකම් කාර්යාලයේ නම් කළ නිලධාරියා විසින් මෙම තොරතුරු ලබා දීම ප්රතික්ෂේප කර තිබුණේ, එම තොරතුරු “පෞද්ගලික තොරතුරු” ගණයට වැටෙන බවත් ඒවා හෙළි කළ නොහැකි බවත් පවසමිනි.
කෙසේ වෙතත්, සභාපති දයා ලංකාපුර, කිෂාලි පින්ටෝ ජයවර්ධන, ජගත් ලියන ආරච්චි සහ මොහොමඩ් නාහියා යන මහත්ම මහත්මීන්ගෙන් සමන්විත තොරතුරු කොමිසම තීන්දු කළේ, රාජ්ය දේපළක් වන වාහන පිළිබඳ තොරතුරු පෞද්ගලික තොරතුරු ලෙස සැලකිය නොහැකි බවයි. ඒ අනුව එම තොරතුරු ප්රසිද්ධ කිරීමට ඇති මහජන අයිතිය කොමිසම විසින් තහවුරු කර තිබේ.
