තමන් කුලී පදනම මත ලබාගත් නිවසක්, එහි අයිතිකරුට නොදන්වා නීති විරෝධී ලෙස වෙනත් පුද්ගලයෙකුට නැවත කුලියට දීමේ (Sub-letting) වංචාවක් සම්බන්ධයෙන් වරදකරු වූ කාන්තාවකට කොළඹ ප්රධාන මහේස්ත්රාත් අසංග එස්. බෝදරගම මහතා මාස හතක ලිහිල් සිර දඬුවමක් නියම කළේය. මීට අමතරව, එම චෝදනාවටම අදාළව තවත් මාස පහක සිර දඬුවමක් නියම කළ මහේස්ත්රාත්වරයා එය වසර 10ක කාලයකට අත්හිටුවීමට ද නියෝග කළේය.
කොළඹ වංචා විමර්ශන කාර්යාංශය අධිකරණයට පෙන්වා දුන්නේ, නිවසේ නීත්යානුකූල හිමිකාරිත්වයක් නොමැතිව වංචනික ලෙස දේපළ බදු දීමෙන් මෙම සැකකාරිය අදාළ සියලුම කුලී මුදල් ලබාගෙන ඇති බවයි. 2018 වසරේදී එම නිවසේ පදිංචිකරුවන් කළ පැමිණිල්ලකට අනුව දීර්ඝ ලෙස විභාග වූ මෙම නඩුවේදී, ඉදිරිපත් වූ සාක්ෂි පදනම් කරගනිමින් සැකකාරිය වරදකරු බවට අධිකරණය තීරණය කළේය. නඩුවට සම්බන්ධව සිටි අනෙක් සැකකරුවන් දෙදෙනා නිදොස් කොට නිදහස් කිරීමට ද මෙහිදී පියවර ගැනිණි.
විශේෂත්වය වන්නේ, මෙම වංචාවෙන් පීඩාවට පත් වූ දේපළෙහි නීත්යානුකූල හිමිකරුවන් තමන්ට මුදල්මය වන්දි අවශ්ය නොවන බව අධිකරණයට දැනුම් දීමයි. කෙසේ වෙතත්, දේපළ අවභාවිතය සහ වංචාව සලකා බලමින් අධිකරණය මෙම සිර දඬුවම නියම කරන ලදී.
