සංචාරක එංගලන්ත කණ්ඩායම සහ ශ්රී ලංකා කණ්ඩායම අතර පැවැත්වෙන තීරණාත්මක තෙවන සහ අවසන් එක්දින ක්රිකට් තරගය අද (27) පස්වරු 2.30ට කොළඹ ආර්. ප්රේමදාස ක්රීඩාංගණයේදී ආරම්භ වීමට නියමිතය.
තරග 1-1ක් ලෙස දෙපිලම සම තත්ත්වයේ පසුවන බැවින්, තරගාවලියේ ජයග්රාහකයන් තේරීම සඳහා මෙම තරගය තීරණාත්මක වේ.
2021 වසරේ සිට සිය මව්බිමේදී සහභාගී වූ කිසිදු එක්දින තරගාවලියක් පරාජයට පත්ව නොමැති ශ්රී ලංකා කණ්ඩායම, එම වාර්තාව තවදුරටත් රැක ගැනීමේ දැඩි අභිලාෂයෙන් අද පිටියට පිවිසෙයි.
තරගයට පෙර පැවති මාධ්ය හමුවේදී නායක චරිත් අසලංක තහවුරු කළේ ප්රබල දඟපන්දු යවන ක්රීඩක වනිඳු හසරංග අද තරගය සඳහා ක්රීඩා කරන බවයි.
දෙවන තරගයේදී අවසන් පන්දුවාර 10 තුළ ලකුණු ලබාගැනීමේ වේගය අඩුවීම පරාජයට ප්රධාන හේතුව වූ බව පෙන්වා දුන් අසලංක, ප්රබල පිතිකරු ජෝ රූට් ඉක්මනින් දවාගැනීම සිය මූලික ඉලක්කයක් බව ද සඳහන් කළේය.
එසේම 2027 ලෝක කුසලානය ඉලක්ක කරගනිමින් ක්රීඩකයන් අත්හදා බැලීම් සිදුකරන බවත්, පවන් රත්නායක වැනි ක්රීඩකයන්ගේ පිතිකරණ අනුපිළිවෙළ ඉදිරියේදී වෙනස් විය හැකි බවත් නායකයා වැඩිදුරටත් කියා සිටියේය.
