ඉරානය තුළ පවතින දේශපාලන අස්ථාවරත්වය සහ එරට රජය විසින් විරෝධතාකරුවන් මර්දනය කිරීම හේතුවෙන් හටගෙන ඇති උණුසුම්කාරී තත්ත්වය හමුවේ, අමෙරිකානු එක්සත් ජනපදය මැදපෙරදිග කලාපයේ සිය මිලිටරි බලය ප්රදර්ශනය කරමින් දැවැන්ත ගුවන් අභ්යාසයක් ආරම්භ කර තිබේ. අමෙරිකානු මධ්යම විධානය (CENTCOM) යටතේ ක්රියාත්මක වන මෙම අභ්යාසය මගින් ඕනෑම හදිසි අවස්ථාවකදී සතුරාට එරෙහිව නිවැරදිව සහ වේගවත්ව ප්රහාරක මෙහෙයුම් දියත් කිරීමේ හැකියාව පරීක්ෂාවට ලක් කෙරේ.
පසුගිය මාසයේ සිට ඉරානය තුළ පැවැත්වෙන විරෝධතා මර්දනය කිරීමේදී පුද්ගලයින් 6,000කට අධික පිරිසක් මියගොස් ඇති බවට ලැබෙන වාර්තා හමුවේ ජනාධිපති ඩොනල්ඩ් ට්රම්ප් දැඩි ස්ථාවරයක සිටින අතර, USS ඒබ්රහම් ලින්කන් (USS Abraham Lincoln) ගුවන් යානා වාහක නෞකාව ප්රමුඛ ‘අර්මඩා’ ප්රහාරක බලඇණිය දැනටමත් ඉන්දීය සාගරය හරහා කලාපයට අවතීර්ණ වී ඇත. මෙම නෞකාව මත සිට ක්රියාත්මක වන නවීනතම MH-60R Sea Hawk හෙලිකොප්ටර් යානා සහ EA-18G Growler ප්රහාරක යානා අභ්යාස සඳහා සූදානම් කර ඇති බව අමෙරිකානු නාවික හමුදාව තහවුරු කරයි.
කෙසේ වෙතත්, සෞදි අරාබිය සහ එක්සත් අරාබි එමීර් රාජ්යය වැනි කලාපීය මිත්ර රටවල් ඉරානයට එරෙහි ඕනෑම සෘජු ප්රහාරයක් සඳහා සිය ගුවන් සීමාව ලබා නොදෙන බව අවධාරණය කර තිබේ. මීට ප්රතිචාර දක්වමින් ඉරානය පවසා ඇත්තේ ටෙහෙරානය අසල විප්ලව චතුරශ්රයේ ප්රදර්ශනය කර ඇති පෝස්ටර් මගින් අමෙරිකානු නෞකා විනාශ කරන බවට අනතුරු අඟවන බවයි. ඕනෑම ආක්රමණයකට එරෙහිව දැඩි ප්රතිප්රහාර එල්ල කිරීමට තමන් සූදානම් බව ඉරාන විදේශ අමාත්යාංශය පවසයි.
