ඉන්දීය අයවැය මගින් සතුන් සහ පක්ෂීන් ආනයනය කිරීම මත 30% ක රේගු බද්ධක් පැනවීමට පියවර ගෙන ඇති අතර, මෙම තීරණය ආසියාවේ ධනවත්ම පුද්ගලයා වන මුකේෂ් අම්බානිගේ පවුල විසින් පවත්වාගෙන යනු ලබන ‘වන්තාරා’ (Vantara) සත්ත්වෝද්යානයට දැඩි බලපෑමක් එල්ල කරනු ඇතැයි වාර්තා වේ. ගුජරාටයේ අක්කර 3,500ක් පුරා විහිදුණු මෙම සත්ත්වෝද්යානය පසුගිය වසර කිහිපය තුළ දකුණු අප්රිකාව, එක්සත් අරාබි එමීර් රාජ්යය සහ වෙනිසියුලාව වැනි රටවලින් චීටාවන්, රයිනෝසිරස්වරුන් සහ උරගයින් විශාල වශයෙන් ආනයනය කර තිබේ. මීට පෙර පැවති බදු සහන අහෝසි කරමින් රජය ගත් මෙම පියවර හේතුවෙන් මෙතෙක් බදු රහිතව සිදුකළ සත්ත්ව ආනයන කටයුතු සඳහා මින් ඉදිරියට අධික පිරිවැයක් දැරීමට අම්බානි පවුලට සිදුවනු ඇත.
අනන්ත් අම්බානිගේ නායකත්වයෙන් ක්රියාත්මක වන ‘වන්තාරා’ ව්යාපෘතිය පවසන්නේ තමන් සතුන් මිලදී ගැනීම සඳහා වාණිජමය ගෙවීම් සිදු නොකරන බවත්, දරනු ලබන පිරිවැය ප්රවාහන හා රක්ෂණ කටයුතු සඳහා පමණක් වැයවන බවත්ය. කෙසේ වෙතත්, නව 30% ක බද්ද හේතුවෙන් ජාත්යන්තර මට්ටමින් සිදුකළ සත්ත්ව මුදාගැනීමේ සහ පුනරුත්ථාපන මෙහෙයුම්වල මූල්ය ව්යුහය සැලකිය යුතු ලෙස වෙනස් වනු ඇති බව නීති විශේෂඥයෝ පෙන්වා දෙති. ඉන්දීය අගමැති නරේන්ද්ර මෝදි සහ පාපන්දු තරුව ලයනල් මෙසී වැනි ප්රභූන්ගේ පවා අවධානයට ලක්වූ මෙම සත්ත්ව මධ්යස්ථානයේ ආනයන වටිනාකම මේ වන විට ඩොලර් මිලියන 9ක් ඉක්මවා ඇති බව රොයිටර් පුවත් සේවය සඳහන් කරයි.
