2026 අංක 1 දරන කොළඹ වරාය නගර ආර්ථික කොමිෂන් සභා සංශෝධන පනත මගින් වරාය නගරය තුළ විදේශීය බැංකු කටයුතු හෙවත් ඔෆ්ෂෝර් බැංකුකරණය සඳහා වන නීතිමය රාමුව දැඩි කර ඇති බව අන්තර්ජාතික විගණන සමාගමක් වන අර්නස්ට් ඇන්ඩ් යන්ග් ශ්රී ලංකා ආයතනය පවසයි. මෙම නව සංශෝධනයට අනුව වරාය නගරය තුළ ඔෆ්ෂෝර් බැංකු බලපත්ර ලබාගැනීමේ අවස්ථාව විදේශීය රටවල ලියාපදිංචි බැංකුවලට පමණක් සීමා කර ඇති අතර මෙරට ලියාපදිංචි දේශීය බැංකුවලට එම බලපත්ර සඳහා ඉල්ලුම් කිරීමේ හැකියාව සම්පූර්ණයෙන්ම ඉවත් කර තිබේ. ඒ අනුව මින් ඉදිරියට වරාය නගරයේ ඔෆ්ෂෝර් බැංකු බලපත්රයක් ලබාගත හැක්කේ වෙනත් රටක ස්ථාපිත කර ඇති සහ එම රටේ නීතිය යටතේ බැංකු කටයුතු කිරීමට අවසර ඇති ආයතනවලට පමණක් වන අතර විදේශීය බැංකුවක් එහි ක්රියාත්මක වීමට නම් වරාය නගර ආර්ථික කොමිෂන් සභාවේ පොදු ව්යාපාර බලපත්රය, ඔෆ්ෂෝර් සමාගම් ලියාපදිංචිය සහ පනතේ 8 වන කොටස යටතේ වන ඔෆ්ෂෝර් බැංකු බලපත්රය යන අනුමැතීන් ත්රිත්වයම ලබාගත යුතුය.
මෙම බැංකු පනතේ 8 වන කොටස යටතේ පාලනය වුවද ශ්රී ලංකා මහ බැංකුව සතු අධීක්ෂණ බලතල එලෙසම පවතින අතර අවම ප්රාග්ධනය, ද්රවශීලතාවය සහ ජාත්යන්තර ප්රමිතීන්ට අනුව හෙළිදරව් කිරීම් අධීක්ෂණය කිරීමේ බලය මහ බැංකුව සතු වේ. මෙරට බැංකු පනත යටතේ දැනටමත් බලපත්ර ලබා ඇති දේශීය බැංකු වරාය නගරයේ සිට කටයුතු කරන්නේ නම් ඔවුන් සඳහා මෙම නව ඔෆ්ෂෝර් බලපත්ර ක්රමය අදාළ නොවන අතර ඔවුන්ට වෙනම ක්රමවේදයක් යටතේ ක්රියාත්මක වීමට සිදුවනු ඇත. මෙම සංශෝධනය හරහා වරාය නගරය තුළ දේශීය බැංකු කටයුතු සහ විදේශීය බැංකු කටයුතු අතර පැහැදිලි වෙන් කිරීමක් සිදු කර ඇති බව EY ආයතනය වැඩිදුරටත් පෙන්වා දෙයි.
