හිටපු මන්ත්රී අමරකීර්ති අතුකෝරළ මහතා ඝාතනය කිරීමේ සිද්ධියට අදාළව සමාජය තුළ වෛරය වපුරමින් මතවාදී පසුබිම සකස් කළ ආචාර්ය නිර්මාල් රංජිත් දේවසිරි මහතාට ද මරණ දඬුවම ලබාදිය යුතු බව හිටපු මහජන ආරක්ෂක අමාත්ය සරත් වීරසේකර මහතා පවසයි. ඊයේ (14) ශ්රී ලංකා පොදුජන පෙරමුණේ පක්ෂ මූලස්ථානයේ පැවති ප්රවෘත්ති සාකච්ඡාවකදී ඔහු මේ බව අවධාරණය කළේය. අතුකෝරළ මන්ත්රීවරයාගේ ඝාතනය සම්බන්ධයෙන් වසර තුනක දීර්ඝ නඩු විභාගයකින් පසු අධිකරණය විසින් පුද්ගලයන් 12 දෙනෙකුට මරණ දඬුවම නියම කිරීම පිළිබඳව අදහස් දක්වමින් ඔහු මෙම චෝදනාව එල්ල කළේය.
මරණ දඬුවම ලැබූ පිරිසට ජනාධිපති සමාව දිය යුතු බවට නිර්මාල් දේවසිරි මහතා කර ඇති ප්රකාශය අධිකරණයට කළ අපහාසයක් බවත්, ඒ සම්බන්ධයෙන් ඔහුට එරෙහිව නඩු පැවරිය හැකි බවත් වීරසේකර මහතා මෙහිදී පෙන්වා දුන්නේය. නිට්ටඹුවේදී මන්ත්රීවරයාව සහ ඔහුගේ ආරක්ෂක නිලධාරියාව රථයෙන් බස්සවා අමානුෂික ලෙස පහර දී ඝාතනය කිරීමට මඟ පෑදුවේ නිර්මාල් දේවසිරි වැන්නවුන් වැපිරූ වෛරය බව ඔහු චෝදනා කළේය. “අරගලය” තුළින් ජනතාවගේ මොළ සෝදා වෛරය වැපිරූ මෙවැනි පිරිස් නීතියෙන් බේරුණත් කර්මයෙන් බේරීමට නොහැකි බවත්, ව්යවස්ථාව උල්ලංඝනය කරමින් මිනිසුන් මැරවීමට හා දේපළ ගිනිතැබීමට පොළඹවන අය විශ්වවිද්යාල ආචාර්යවරුන් ලෙස කටයුතු කිරීම ගැටලුවක් බවත් ඔහු වැඩිදුරටත් ප්රකාශ කළේය.
එදා අරගලය ඇති වූයේ කොරෝනා වසංගතය නිසා විදේශ විනිමය අහිමි වී තෙල් සහ ගෑස් හිඟ වූ නිසා මිස රජයේ සොරකම් නිසා නොවන බවත්, ජනතා විමුක්ති පෙරමුණ සහ නිර්මාල් වැනි පිරිස් “සියල්ලෝම හොරු” යන බොරු මතය පතුරුවා ජනතාව කුපිත කළ බවත් හිටපු අමාත්යවරයා පැවසීය. පාර්ලිමේන්තුව ගිනිතැබීමට උත්සාහ කළ පුද්ගලයන් අද කැබිනට් මණ්ඩලයේ සිටින බවත්, එවැනි රජයක් යටතේ වුවද අධිකරණය ස්වාධීනව මෙම තීන්දුව ලබා දීම අගය කළ යුතු බවත් ඔහු සඳහන් කළේය. එදා පොලිසියට අවි නිකුත් නොකරන ලෙස නීති විරෝධී නියෝග ලබා දුන් පුද්ගලයන් ද මෙම ඝාතනවලට වගකිව යුතු බවත්, ඒ පිළිබඳව ද පූර්ණ විමර්ශනයක් කළ යුතු බවත් පවසමින් ඔහු සිය කතාව අවසන් කළේය.
