පිළිකා රෝගීන් මුල් අවධියේදීම හඳුනා ගැනීම සඳහා සිදු කරනු ලබන PET SCAN (Positron Emission Tomography) පරීක්ෂණවලදී අත්යවශ්ය වන FDG (Fluoro Deoxy Glucose) නැමැති විකිරණශීලී ඖෂධය මෙරට තුළ නිෂ්පාදනය කිරීම අද (16) නිල වශයෙන් ආරම්භ විය. කටුනායක කිබුලාපිටිය ප්රදේශයේ පිහිටි ශ්රී ලංකා ආයෝජන මණ්ඩල සැකසුම් කලාපයේ ඉදිකරන ලද සයික්ලොට්රෝන් පාදක විකිරණශීලී ඖෂධ නිෂ්පාදන විද්යාගාරය (Cyclotron Based Radiopharmaceutical Manufacturing Facility) විද්යා හා තාක්ෂණ අමාත්ය මහාචාර්ය ක්රිෂාන්ත අබේසේන මහතාගේ ප්රධානත්වයෙන් විවෘත කරන ලදී. ඇමරිකානු ඩොලර් 6,875,000 ක ආයෝජනයකින් නිම වූ මෙම ව්යාපෘතිය ශ්රී ලංකාව තුළ මෙවැනි ඖෂධයක් නිෂ්පාදනය කරන ප්රථම අවස්ථාව ලෙස ඉතිහාසයට එක් වේ.
මෙම ව්යාපෘතිය රාජ්ය හා පෞද්ගලික අංශ ඒකාබද්ධ වූ හවුල්කාරිත්වයක් ලෙස ක්රියාත්මක වන අතර එහිදී ඇක්සස් මෙඩිකල් ට්රේසර්ස් (Access Medical Tracers) සමාගම සියයට 60ක කොටස් හිමිකාරීත්වයක් දරනු ලබයි. ඉතිරි කොටස් ප්රමාණය ඇක්සස් ඉන්ටර්නැෂනල් සමාගම (20%), ශ්රී ලංකා පරමාණුක බලශක්ති අධිකාරිය (10%) සහ සෞඛ්ය අමාත්යාංශය (10%) අතර බෙදී යයි. මීට පෙර මෙම ඖෂධය ඉන්දියාවෙන් ආනයනය කිරීමට සිදු වූ අතර, එම ගමනාගමන කාලය තුළ ඖෂධයේ සක්රීයතාවයෙන් සියයට 97ක් පමණ විකිරණ ක්ෂය වීම නිසා අහිමි වීම රෝග විනිශ්චයේ නිරවද්යතාවයට ගැටලුවක්ව පැවතිණි. මෙරට තුළම නිෂ්පාදනය ආරම්භ වීමත් සමඟ වඩාත් නිරවද්ය හා වේගවත් රෝග විනිශ්චයක් ලබා දීමටත්, විශාල විදේශ විනිමයක් රට තුළ ඉතිරි කර ගැනීමටත් අවස්ථාව උදා වේ.
2030 වන විට වාර්ෂිකව පිළිකා රෝගීන් ප්රමාණය සියයට 23කින් ඉහළ යනු ඇතැයි පුරෝකථනය කර ඇති බැවින්, මෙවැනි දේශීය නිෂ්පාදන ආරම්භ කිරීම එම අනාගත අභියෝගයට සාර්ථකව මුහුණ දීමට අත්යවශ්ය පියවරක් බව විද්යා හා තාක්ෂණ අමාත්යවරයා මෙහිදී අවධාරණය කළේය. මෙම අවස්ථාවට සෞඛ්ය හා ජනමාධ්ය අමාත්යාංශයේ ලේකම් විශේෂඥ වෛද්ය අනිල් ජාසිංහ මහතා ඇතුළු සම්භාවනීය අමුත්තන් රැසක් සහභාගී වූහ. අඛණ්ඩ ඖෂධ සැපයුමක් සහතික කිරීම මගින් මෙරට නිදහස් සෞඛ්ය සේවාව වඩාත් ශක්තිමත් කිරීමට මෙම මධ්යස්ථානය මගින් ලැබෙන දායකත්වය අතිමහත් බව ලේකම්වරයා මෙහිදී වැඩිදුරටත් ප්රකාශ කළේය.
