2025 වසරේ ජනවාරි මාසයේදී කුට්ටිගල පදලංගල හමුදා කඳවුරේ සේවය කළ සෙබළෙකුගේ මරණය සම්බන්ධයෙන් කෙරුණු විමර්ශනවලට අදාළව යුද හමුදා සැරයන්වරයෙකු ඇතුළු සිව්දෙනෙකු ලබන මාර්තු 03 වනදා දක්වා රිමාන්ඩ් භාරයේ තැබීමට ඇඹිලිපිටිය අතිරේක මහේස්ත්රාත් දිලුම් ප්රනාන්දු මහතා ඊයේ (17) නියෝග කළේය.
මාතලේ මල්ගම්මන ප්රදේශයේ පදිංචි 31 හැවිරිදි දෙදරු පියෙකු වූ චානක මධුෂාන් ජයසිංහ නැමැති සෙබළා 2025 ජනවාරි 26 දින අතුරුදන් වූ බව කඳවුරේ බලධාරීන් පවසා තිබුණි. දින 7කට පසු ඔහුගේ නරක් වූ සිරුර කඳවුරු මායිමේ වැටක් අසල තිබී සොයා ගත් අතර සිරුර හඳුනා ගැනීමට සිදු වූයේ දත් පරීක්ෂාවෙනි.
අපරාධ පරීක්ෂණ දෙපාර්තමේන්තුවේ (CID) මනුෂ්ය ඝාතන අංශය සිදුකළ වසරකට ආසන්න විමර්ශනයකින් පසු අනාවරණය වී ඇත්තේ, සෙබළා විදුලි සැර වැදී මියගොස් ඇති බවත්, පසුව එම මරණය වසන් කිරීම සඳහා සැකකරුවන් විසින් සිරුර කැලෑවට ඇද දමා ඇති බවත්ය. ඔහුගේ ජංගම දුරකථනය සහ විදුලි කම්බි රෝල ද අසල වතුර වළකට විසිකර තිබී ඇත.
මෙලෙස රිමාන්ඩ් භාරයට පත් වූයේ යුද හමුදා පොදු සේවා බලකායේ සැරයන් නීල් සුරංග, සෙබළ හර්ෂණ හෙට්ටිආරච්චි සහ ප්රදේශවාසීන් දෙදෙනෙකු වන සුරේෂ් ප්රියංකර (ලොකු) සහ ධනුෂ්ක ධනංජය යන අයයි.
මෙම සෙබළාගේ පවුලේ අය මුල සිටම මෙය ඝාතනයක් බවට සැක කරමින් පොලිසියට පැමිණිලි කර තිබූ අතර, CID විමර්ශන මඟින් සත්ය තොරතුරු අනාවරණය කර ගැනීමට හැකි විය.
