ඉරානය සමඟ අර්ථවත් න්යෂ්ටික ගිවිසුමකට එළඹීමට නොහැකි වුවහොත් එරෙහිව දැඩි මිලිටරි ක්රියාමාර්ග ගැනීමට සිදු වනු ඇති බවට අමෙරිකානු ජනාධිපති ඩොනල්ඩ් ට්රම්ප් දැඩි අනතුරු ඇඟවීමක් සිදු කර තිබේ. වොෂින්ටන් ඩී.සී. හි පැවැති ‘සාම මණ්ඩලයේ’ (Board of Peace) සමාරම්භක රැස්වීමේදී ඔහු මේ බව අවධාරණය කළේය.
සාකච්ඡා මාර්ගයෙන් විසඳුමකට එළඹෙන්නේද නැතහොත් යුදමය ක්රියාමාර්ග ගන්නේද යන්න පිළිබඳව බොහෝ විට ඉදිරි දින 10 ඇතුළත ලෝකයට දැන ගැනීමට හැකි වනු ඇති බව ජනාධිපතිවරයා මෙහිදී පවසා ඇත. ඉරානය සමඟ අමෙරිකාව පවත්වන සාකච්ඡා සම්බන්ධයෙන් අදහස් දැක්වූ ඔහු, “අපට අර්ථවත් ගිවිසුමක් ඇති කර ගැනීමට සිදු වනවා, එසේ නොවුවහොත් නරක දේවල් සිදුවේවි” යනුවෙන් ප්රකාශ කර තිබේ
විදේශ මාධ්ය වාර්තාවලට අනුව, ස්විට්සර්ලන්තයේ පැවැත්වෙන අමෙරිකානු සහ ඉරාන සාකච්ඡාකරුවන් අතර සාකච්ඡාවල යම් ප්රගතියක් පවතින අතරතුරම, එක්සත් ජනපදය මැදපෙරදිග කලාපයට සිය හමුදා ශක්තිය ද දැඩි ලෙස යොමු කර තිබේ. විශේෂ දූතයින් වන ස්ටීව් විට්කොෆ් සහ ජැරඩ් කුෂ්නර් ඉරානය සමඟ සාර්ථක රැස්වීම් කිහිපයක් පවත්වා ඇති බවද ට්රම්ප් සඳහන් කර ඇත.
කෙසේ වෙතත්, කොන්ග්රස් මණ්ඩලයේ අනුමැතියකින් තොරව ඉරානයට එරෙහිව කිසිදු මිලිටරි ක්රියාමාර්ගයක් නොගත යුතු බවට ඩිමොක්රටික් සහ ඇතැම් රිපබ්ලිකන් මන්ත්රීවරුන් සිය විරෝධය පළ කර තිබේ. මේ අතර, ධවල මන්දිර මාධ්ය ලේකම් කැරොලයින් ලෙවිට් ද පවසා ඇත්තේ ඉරානය එක්සත් ජනපදය සමඟ ගිවිසුමකට එළඹීම “ඉතා බුද්ධිමත්” තීරණයක් වනු ඇති බවයි.
