2009 සහ 2010 වසරවලදී සේවයට එක්වූ ග්රාම නිලධාරීන් මුහුණ දෙන වසර 17ක් පැරණි බරපතල ශ්රේණි ගැටලුව සම්බන්ධයෙන් සාකච්ඡා කිරීම සඳහා රාජ්ය පරිපාලන, පළාත් සභා හා පළාත් පාලන අමාත්යාංශය විසින් හදිසි සාකච්ඡාවක් ලබා දී තිබේ. සිය වෘත්තීය අයිතිවාසිකම් දිනා ගැනීම වෙනුවෙන් එළඹෙන මාර්තු 03 වන දින අමාත්යාංශය ඉදිරිපිට පැවැත්වීමට සැලසුම් කර තිබූ නිහඬ විරෝධතාව පිළිබඳ මාධ්ය වාර්තා වීමත් සමඟ බලධාරීන් මෙම තීරණය ගෙන ඇත.
මෙම ගැටලුවට ප්රධාන වශයෙන් මුහුණ පා සිටින්නේ 2007 වසරේ තරග විභාගයෙන් සමත්ව සේවයට එක්වූ 2,300කට අධික නිලධාරීන් පිරිසකි. මෙය සමස්ත ග්රාම නිලධාරී සේවයෙන් 25%කට ආසන්න සැලකිය යුතු ප්රතිශතයක් වන අතර, සේවා ව්යවස්ථාවේ පවතින විෂමතා හේතුවෙන් තමන්ට හිමි විය යුතු උසස්වීම් සහ ශ්රේණිගත කිරීම් වසර ගණනාවක සිට අහිමි වී ඇති බවට ඔවුන් චෝදනා කරති. මීට පෙර අවස්ථා කිහිපයකදීම බලධාරීන් සමඟ සාකච්ඡා කළ ද, ඒවා සාර්ථක නොවූ බවත් පරිපාලන නිලධාරීන් දිගින් දිගටම කල්මැරීමේ ප්රතිපත්තියක පසුවන බවත් 2009/2010 ග්රාම නිලධාරී එකමුතුව ප්රකාශ කරයි.
එළඹෙන සාකච්ඡාවේදී තම ඉල්ලීම්වලට සාධාරණ සහ ස්ථිර විසඳුමක් නොලැබුණහොත්, සැලසුම් කර ඇති පරිදි මාර්තු 03 වන දින සියලුම ග්රාම නිලධාරී සංගම්වල සහය ඇතිව දැඩි වෘත්තීය ක්රියාමාර්ගයකට එළඹෙන බව එම එකමුතුව අවධාරණය කරයි. ග්රාමීය මට්ටමේ පරිපාලන කටයුතු සෘජුවම මෙහෙයවන ග්රාම නිලධාරීන්ගේ මෙම සේවා ගැටලුව විසඳීම සමස්ත රාජ්ය සේවයේ කාර්යක්ෂමතාව කෙරෙහි ද බලපානු ඇත.
