මෙරට ඉන්ධන බෙදාහැරීමේ කටයුතු කිසිදු බාධාවකින් තොරව අඛණ්ඩව සිදුකරන බව ලංකා ඛනිජ තෙල් නීතිගත සංස්ථාව (CPC) අවධාරණය කරයි. සංස්ථා සභාපති ඩී.ජේ. රාජකරුණා මහතා සඳහන් කළේ හෙට (02) දිනයේදී ද සාමාන්ය පරිදි ඉන්ධන බෙදාහැරීම් සිදුකරන බවයි. අද (01) රජයේ නිවාඩු දිනයක් වුවද, සේවක මණ්ඩලයේ පූර්ණ දායකත්වයෙන් ඉන්ධන නිකුත් කිරීමේ කටයුතු සාර්ථකව සිදුකළ බව ද ඔහු වැඩිදුරටත් කියා සිටියේය.
සභාපතිවරයා නිකුත් කළ දත්තවලට අනුව, අද පස්වරු 5.00 වන විට ඩීසල් ලීටර් 1,332,311ක් සහ ඔක්ටේන් 92 වර්ගයේ පෙට්රල් ලීටර් 2,019,600ක් දිවයින පුරා බෙදාහැර තිබේ. මැදපෙරදිග පවතින තත්ත්වය හමුවේ ඇති වී තිබෙන ඉන්ධන ඉල්ලුමට සරිලන පරිදි ප්රමාණවත් සංචිත පවතින බැවින් මහජනතාව අනවශ්ය ලෙස කලබල විය යුතු නැති බව සංස්ථාව නැවතත් සිහිපත් කරයි.
එසේම, පෞද්ගලික නිවාස හෝ ස්ථානවල අනවශ්ය ලෙස ඉන්ධන රැස්කර තබා ගැනීම නීති විරෝධී ක්රියාවක් බව සභාපතිවරයා පෙන්වා දුන්නේය. එවැනි පුද්ගලයින්ට සහ කණ්ඩායම්වලට එරෙහිව දැඩි නීතිමය ක්රියාමාර්ග ගන්නා ලෙස පොලිස් මූලස්ථානයෙන් විශේෂ ඉල්ලීමක් කර ඇති බව ද ඔහු සඳහන් කළේය. පිරවුම්හල් අසල පවතින පෝලිම් පාලනය කිරීමට සහ නීති විරෝධී ලෙස ඉන්ධන රැස්කිරීම වැළැක්වීමට පොලිස් ආරක්ෂාව ද යොදවා තිබේ.
