විස්සයි විස්ස ලෝක කුසලාන ක්රිකට් තරගාවලියේ තීරණාත්මක සුපිරි 8 දෙනාගේ වටයේ තරගයකදී සිම්බාබ්වේ කණ්ඩායම කඩුලු 5කින් පරාජය කරමින් අපරාජිතව අවසන් පූර්ව වටයට සුදුසුකම් ලැබීමට දකුණු අප්රිකාව අද (01) සමත් විය. මෙම ජයග්රහණයත් සමඟ දකුණු අප්රිකානු කණ්ඩායම අවසන් පූර්ව වටයේදී නවසීලන්තයට එරෙහිව තරග වැදීමට නියමිතය. තරගාවලියේ මෙතෙක් සහභාගී වූ තරග 7ම ජයග්රහණය කරමින් ඔවුන් සිය ප්රථම ලෝක කුසලාන සිහිනය කරා සාර්ථකව ගමන් කරමින් සිටියි.
කාසියේ වාසිය දිනා පළමුව පන්දුවට පහරදුන් සිම්බාබ්වේ කණ්ඩායම නියමිත පන්දුවාර 20 අවසානයේ කඩුලු 7ක් දැවී ලකුණු 153ක් රැස් කළේය. එහිදී සිම්බාබ්වේ නායක සිකන්දර් රාසා පන්දු 34කදී වේගවත් ලකුණු 73ක් රැස් කරමින් සිය කණ්ඩායම ස්ථාවර මට්ටමකට රැගෙන ආවේය. දකුණු අප්රිකාව වෙනුවෙන් පන්දු යැවීමේදී යොවුන් වේග පන්දු යවන ක්රීඩක ක්වෙනා මෆාකා ලකුණු 21කට කඩුලු 2ක් දවා ගැනීමට සමත් විය.
ලකුණු 154ක ජයග්රාහී ඉලක්කයක් හඹාගිය දකුණු අප්රිකානු කණ්ඩායමේ මුල් කඩුලු 3 ලකුණු 43ක් තුළ බිඳ වැටුණ ද, යොවුන් ක්රීඩක ඩිවෝල්ඩ් බ්රෙවිස් පන්දු 18කදී රැස් කළ ලකුණු 42 ඉනිමේ හැරවුම් ලක්ෂ්යය බවට පත් විය. අනතුරුව ජෝර්ජ් ලින්ඩේ (31) සහ ට්රිස්ටන් ස්ටබ්ස් (21) එක්ව තවත් පන්දු 13ක් ඉතිරිව තිබියදී දකුණු අප්රිකාව ජයග්රහණය කරා මෙහෙයවූහ. පන්දු යැවීමේදී ද දස්කම් පෑ සිකන්දර් රාසා ලකුණු 29කට කඩුලු 3ක් දවා ගත්තද එය ජයග්රහණයට ප්රමාණවත් නොවීය.
